भेरी अस्पतालका स्वास्थ्यकर्मी आन्दोलित

स्वास्थ्य

गृहपृष्ठ
स्वास्थ्य
भेरी अस्पतालका स्वास्थ्यकर्मी आन्दोलित

भेरी अस्पतालका स्वास्थ्यकर्मी आन्दोलित

शुक्रबार, जेठ १४, २०७८ बागेश्वरी पोस्ट

नेपालगन्ज । बाँकेको नेपालगन्जस्थित भेरी अस्पतालमा सहकर्मीमाथि हातपात र कुटपिट भएपछि स्वास्थ्यकर्मी आन्दोलित भएका छन् ।

गएराति दाङका एक जना कोरोना संक्रमित विरामीको उपचारका क्रममा मृत्यु भएपछि मृतकका आफन्तले ड्युटीमा खटिएका डाक्टर र नर्सलाई आक्रमण गरेको विरोधमा स्वास्थ्यकर्मी आन्दोलनमा उत्रिएका हुन् । सबै स्वास्थ्यकर्मीले काम छाडेर दोषीमाथि तत्काल कारवाही हुनुपर्ने माग गर्दै अस्पताल परिसरमा प्रदर्शन गरेका छन् । उनीहरुको प्रदर्शनका कारण अस्पतालको कोभिड वार्डको उपचार प्रभावित भएको छ । उनीहरुले दोषीलाई तत्काल कारवाही नहुँदासम्म काममा नफर्कने अडान लिएका छन् ।

विरामीको मृत्युपछि उनका कुरुवा र आफन्तले आइसियु कक्षमै प्रवेश गरी स्वास्थ्यकर्मीमाथि आक्रमण गरेको भेरी अस्पतालले जनाएको छ । स्वास्थ्यकर्मीले शौचालयको झ्यालबाट हाम फालेर ज्यान जोगाएको बताएका छन् । आक्रमणबाट ज्यान जोगाउन डा. चन्द्रप्रकाश साहु, नर्सहरु सदिक्षा गैरे, बन्दना श्रेष्ठ र आश्विन गुरुङले पहिलो तलाबाट हाम फालेर भागेका थिए । उनीहरुले आइसियु कक्षमा तोडफोड समेत गरेका थिए । घटनामा संलग्न तीन जनालाई प्रहरीले नियन्त्रणमा लिएको छ । मृतकका २ जना भाई मान बहादुर रावत र मृतकका छोरालाई प्रहरीले पक्राउ गरेको हो ।

घटनाबारे सत्यतथ्य छानबिन गर्न सहायक प्रमुख जिल्ला अधिकारी शंकर विष्टको संयोजकत्वमा सात सदस्यीय छानबिन समिति गठन गरिएको छ ।

यता मृतकका आफन्तले भने चिकित्सक र नर्सको लापरबाहीले विरामीको मृत्यु भएको आरोप लगाएका छन् । विरामीका आफन्तले आफूहरुले आक्रमण नगरेको जिकिर गरेका छन् । स्वास्थ्यकर्मीले विरामीको मनोबल गिर्ने गरी व्यवहार गरेको, विरामीलाई फरक व्यवहार गर्ने गरेको, आइसियुमा बोल्दै गरेको विरामीलाई जबर्जस्ती भेन्टिलेटरमा सारेको आरोप विरामीका आफन्तहरुको छ ।

प्रकाशित मिति: शुक्रबार, जेठ १४, २०७८ ११:२३

प्रतिक्रिया दिनुहोस्