निर्मला पन्त हत्या प्रकरण:एक जना भारतीय नागरिकको डीएनए जाँच गर्न काठमाडौं पठाइयो

सुरक्षा-अपराध

गृहपृष्ठ
सुरक्षा-अपराध
निर्मला पन्त हत्या प्रकरण:एक जना भारतीय नागरिकको डीएनए जाँच गर्न काठमाडौं पठाइयो

निर्मला पन्त हत्या प्रकरण:एक जना भारतीय नागरिकको डीएनए जाँच गर्न काठमाडौं पठाइयो

सोमबार, पुस १९, २०७८ बागेश्वरी पोस्ट

नेपालगन्ज । कञ्चनपुरकी १३ वर्षीया बालिका निर्मला पन्त बलात्कारपछि हत्या प्रकरणमा अनुसन्धानका लागि एक जना भारतीय नागरिकलाई प्रहरीले पक्राउ गरेको छ । निर्मला पन्त बलात्कारपछि हत्या प्रकरणमा साढे तीन वर्षपछि एक भारतीयलाई पक्राउ गरी अनुसन्धान थालिएको कञ्चनपुर प्रहरीले जनाएको छ । ती नागरिकलाई पक्राउ गरी डीएनए परिक्षणका लागि काठमाडौं पठाइएको छ ।

घटनाका बेला तीन जना भारतीय नागरिक कञ्चनपुरको उल्टाखाम क्षेत्रमै बसोबास गरेको पाइएपछि प्रहरीले ती मध्येका एक जनालाई नियन्त्रणमा लिई अनुसन्धान प्रक्रिया अघि बढाएको हो । पक्राउ परेका ती भारतीय नागरिक निर्मलाको हत्या भएपछि बेपत्ता भएका थिए।

ती नागरिक बलात्कार तथा हत्या घटनामा संलग्न रहेको बारे भने पुष्टि भएको छैन । नियमित अनुसन्धानको प्रक्रिया अन्तर्गत उनी निगरानीमा रहेको प्रहरी स्रोतले जनाएको छ ।

निर्मला २०७५ साउन १० गते बेपत्ता भएकी थिइन् । उनी अर्को दिन उखुबारीमा नग्न अवस्थामा मृत भेटिएकी थिइन् । उनको बलात्कारपछि हत्या भएको सन्दर्भमा थुप्रै छानबिन समिति बने पनि अहिलेसम्म पत्तो भने लाग्न सकेको छैन ।

प्रकाशित मिति: सोमबार, पुस १९, २०७८ १०:२९