बरिष्ठ लोकगायक तथा कलाकार जयनन्द लामाको निधन

समाचार

गृहपृष्ठ
समाचार
बरिष्ठ लोकगायक तथा कलाकार जयनन्द लामाको निधन

बरिष्ठ लोकगायक तथा कलाकार जयनन्द लामाको निधन

बुधबार, फागुन ११, २०७८ बागेश्वरी पोस्ट

नेपालगञ्ज । बरिष्ठ लोकगायक तथा कलाकार जयनन्द लामाको निधन भएको छ । उनको बुधबार बिहान निधन भएको हो ।सिन्धुपाल्चोक बाह्रविसे नगरपालिका-२ धार्पाका लामाको आज बिहान भक्तपुरस्थित कौशलटारमा निधन भएको हो ।

उनले पाँच दशक अघि गायन यात्रा शुरू गरेका थिए । ख्यातिप्राप्त लोकगायक, संकलक, अभिनेता, निर्माता तथा निर्देशक लामा विहान घरको गेटमा मृत अवस्थामा भेटिएका हुन् । गएराति बौद्धबाट घर फर्किएका लामा गाडीबाट झर्ने बेला लडेको देखिएको छ । आफ्नै घर अगाडि कारबाट झर्दै गर्दा लडेर मृत्यु भएको प्रहरीको प्रारम्भिक अनुसन्धानबाट खुलेको छ ।

महानगरीय प्रहरी परिसर भक्तपुरका सूचना अधिकारी प्रहरी नायव उपरीक्षक राजु पाण्डेका अनुसार घर-परिवारले राति २ बजेतिर गाडीको आवाज सुने पनि बिहान मात्र उठेर हेरेका थिए ।

‘घर परिवारले राति २ बजेतिर गाडीको आवाज सुनेका थिए । तर, राति उठेर हेरेका रहेनछन्। उहाँ लडेको बिहान मात्रै थाहा भएको हो । एउटा खुट्टा कारमा थियो । जिउ भुइँमा लडिरहेको थियो । अल्झिए जस्तो देखिन्छ । टाउकोमा चोट लागेको देखिन्छ,' पाण्डेले भने ।

लामाका कलकत्ते काइँयो केश मेरो बाँगो, पानी पर्‍यो बलेसी, हेलम्बु डाँडापारि, मेरो माया छ भने त्यता, लौन हजुर के गरौं नक्कलीलाई पातलीलाई कसरी बे गरुँ, चुईं चुईं चुइँकने जुत्ता, केको साँचो डल्ली रेशम फलामको साँचो, पानको पात, सलल पानी यही बस्यो बानी आँखैमा गाँजलु काखैमा मादलु जस्ता दर्जनौं लोकगीत अहिले पनि उत्तिकै लोकप्रिय छन् ।

एक सय भन्दा बढी चलचित्रमा अभिनय गरिसकेका लामाले २०३० सालमा मनको बाँध चलचित्रमा पहिलोपटक अभिनय गरेका थिए । पछिल्लो समय हाँस्य टेली श्रृंखला हल्का रमाइलोमा उनले अभिनय गर्दै आएका थिए ।

प्रकाशित मिति: बुधबार, फागुन ११, २०७८ ०९:२७

प्रतिक्रिया दिनुहोस्