गाडीको ठक्करबाट वडा अध्यक्षको निधनपछि सुर्खेतको छिन्चु बजार बन्द

समाचार

गृहपृष्ठ
समाचार
गाडीको ठक्करबाट वडा अध्यक्षको निधनपछि सुर्खेतको छिन्चु बजार बन्द

गाडीको ठक्करबाट वडा अध्यक्षको निधनपछि सुर्खेतको छिन्चु बजार बन्द

शनिबार, फागुन १४, २०७८ बागेश्वरी पोस्ट

नेपालगन्ज । गत फागुन ८ गते भेरीगंगा नगरपालिका १२ छिन्चु बजार सुर्खेतमा फोर्स गाडीको ठक्करले गम्भीर घाइते भई उपचाररत वडा अध्यक्ष नवराज कार्कीको निधन भएपछिअ आज स्थानीयले सुर्खेतको छिन्चु बजार र सडक बन्द गराएका छन् ।

दोषीलाई कारवाहीको माग राख्दै मृतकका परिवारलाई उचित क्षतिपूर्ति दिनुपर्ने र उपचारमा लागेको सम्पूर्ण खर्च दिनुपर्ने लगायतका माग राख्दै आज बिहानदेखि स्थानीयले बजार र सडक बन्द गराएका हुन् ।

बन्दले गर्दा यातायात पूर्णरुपमा ठप्प छ भने नेपालगन्जबाट सुर्खेततर्फ जाने र सुर्खेतबाट कोहलपुर हुँदै नेपालगन्ज तथा अन्य गन्तव्यमा जाने सवारीसाधन र यात्रुहरु बीचमै रोकिएको जिल्ला प्रहरी कार्यालय सुर्खेतले जनाएको छ ।

कार्की सवार भे ६ प ४४०१ नम्बरको मोटरसाइकललाई फागुन ८ गते भेरीगंगा नगरपालिका १२ छिन्चु बजार नजिक कर्णाली प्रदेश ०२-००१ ख ०५४६ नम्बरको फोर्स गाडीले ठक्कर दिएको थियो ।

ठक्करबाट गम्भीर घाइते भएका भेरीगंगा नगरपालिका १ सुर्खेतका वडा अध्यक्ष कार्कीलाई थप उपचारका लागि फागुन ९ गते हेलिकप्टरबाट काठमाडौं लगिएको थियो । उनको उपचारको क्रममा गएराती काठमाडौंको न्यूरो अस्पतालमा निधन भएको जिल्ला प्रहरी कार्यालय सुर्खेतले जनाएको छ ।

वि.सं. २०७४ को स्थानीय तहको निर्वाचनबाट माओवादी केन्द्रबाट वडा अध्यक्षमा निर्वाचित भएका उनी सुर्खेतका सबैभन्दा कान्छा ३० बर्षीय वडा अध्यक्ष थिए । दुर्घटनामा घाइते भएका मोटरसाइकल चालक २० बर्षीय भुपेन्द्र शाहीको बी एन्ड बी अस्पताल काठमाडौंमा उपचार भइरहेको प्रहरीले जनाएको छ ।

प्रकाशित मिति: शनिबार, फागुन १४, २०७८ १३:१४