नेपालगञ्ज उपमहानगरपालिका बाल विवाहमुक्त घोषणा

स्थानीय

गृहपृष्ठ
स्थानीय
नेपालगञ्ज उपमहानगरपालिका बाल विवाहमुक्त घोषणा

नेपालगञ्ज उपमहानगरपालिका बाल विवाहमुक्त घोषणा

सोमबार, फागुन २३, २०७८ बागेश्वरी पोस्ट

नेपालगञ्ज । नेपालगञ्ज उपमहानगरपालिकालाई आज बालविवाह मुक्त वडा घोषणा गरिएको छ । यो संगै बाँकेमा बाल विवाहमुक्त घोषणा हुने स्थानीय तहको संख्या ४ पुगेको छ । यसअघि जानकी, खजुरा र बैजनाथ गाउँपालिका बाल विवाहमुक्त घोषणा भइसकेका छन् ।

उपमहानगरपालिकामा आयोजित कार्यक्रममा घोषणा गर्न बाँकी रहेका १२ वडालाई बाल विवाहमुक्त वडा घोषणा गर्दै समग्रमा उपमहानगरपालिकालाई नै बाल विवाहमुक्त घोषणा गरिएको हो । सोमबार वडा नम्बर ५, ६, ७, ८, १३, १४, १५, १६, १७, १९, २२ र २३ नम्बर वडालाई बाल विवाहमुक्त वडा घोषणा गरिएको हो । नगरका २३ वडालाई नै बाल विवाहमुक्त वडा घोषणा गरिएपछि उपमहानगरपालिकालाई नै बाल विवाहमुक्त पालिका घोषणा गरिएको हो ।

घोषणासभामा जिल्ला समन्वय समिति बाँकेका संयोजक अजय श्रीवास्तवले फागुनभित्रै जिल्लालाई बाल विवाहमुक्त जिल्ला घोषणा गर्न लागिएको जानकारी दिँदै फागुनभित्रै बाल विवाह मुक्त घोषणा गर्ने नेपालगञ्ज उपमहानगरपालिकालाई १० लाख पुरस्कार प्रदान गरिने बताए ।

नेपालगञ्ज उपमहानगरपालिकाका उपप्रमुख उमा थापा मगरले चुनौतीका बीचमा पनि नगरलाई बाल विवाहमुक्त घोषणा गर्न सकिएको बताइन् । उनले घोषणा कार्यान्वयनका लागि सबै नगरबासीको साथ र सहयोगको अपेक्षा गरिएको बताइन् । घोषणामा साथ र सहयोग गर्ने सबैलाई उनले आभार ब्यक्त गरिन् ।

कार्यक्रममा प्रमुख प्रशासकीय अधिकृत जगत बस्नेत, नेपाली काँग्रेस बाँकेका सचिव सुधांशु कोइराला, नेकपा एमालेका नेपालगञ्ज उपमहानगरपालिका कमिटीका अध्यक्ष दत्तप्रसाद आचार्य, उपमहानगरपालिका सामाजिक विकास महाशाखा प्रमुख शोभा शाह, वडा नम्बर १७ का वडा अध्यक्ष अजय पाठक लगायतले मन्तव्य ब्यक्त गरेका थिए ।

कार्यक्रममा वडा अध्यक्ष तथा सदस्य, कार्यपालिका सदस्य, सामाजिक संघ संस्थाका प्रतिनिधि, कर्मचारी, बाल क्लवका प्रतिनिधि लगायतको सहभागिता थियो । घोषणा अघि गरिएको सर्भेक्षणमा नेपालगञ्जमा ५.७७ प्रतिशत मात्रै बाल विवाह भएको पाइएको छ ।

प्रकाशित मिति: सोमबार, फागुन २३, २०७८ १६:०३

प्रतिक्रिया दिनुहोस्