पश्चिमा राष्ट्रहरुले युक्रेनमा हतियार पठाए आक्रमण गर्ने रुसको धम्की

विश्व

गृहपृष्ठ
विश्व
पश्चिमा राष्ट्रहरुले युक्रेनमा हतियार पठाए आक्रमण गर्ने रुसको धम्की

पश्चिमा राष्ट्रहरुले युक्रेनमा हतियार पठाए आक्रमण गर्ने रुसको धम्की

आइतबार, फागुन २९, २०७८ बागेश्वरी पोस्ट

नेपालगन्ज । रूसले युक्रेनमाथि गरेको आक्रमणको दुई हप्ता सकिन लाग्दा पनि युक्रेन अहिलेसम्म एक्लै आक्रमणको सामना गरिरहेको छ ।

पश्चिमा महाशक्ती राष्ट्रहरुले युक्रेनलाई हतियार पठाउने कुरा चलिरहँदा रुसले यदि कुनै पनि पश्चिमा देशहरुले युक्रेनमा हातहतियार पठाए त्यसको ढुवानीमै आक्रमण गर्ने धम्कीसहितको चेतावनी दिएको छ । रुसका उपविदेशमन्त्री सर्गेई र्याबकोभले युक्रेनमा पश्चिमी हतियारको आपूर्तिलाई लक्षित गर्दै आक्रमण गर्ने धम्की दिएका हुन् ।

रुसको कडा चेतावनीले मस्को र नाटो राष्ट्रबीच प्रत्यक्ष टकरावको जोखिम बढाएको छ। रुसको चेतावनी यस्तो बेलामा आएको छ कि जब अमेरिकाले युक्रेनका लागि सैन्य शिक्षा र तालिम एवं 'तत्काल' रक्षा सहायता र सेवाहरूका लागि २०० मिलियन डलर स्वीकृत गरेको छ ।

एक अमेरिकी अधिकारीका अनुसार यो सहायतामा 'रूसको अप्रत्याशित आक्रमणको सामना गरिरहेका युक्रेनको फ्रन्ट-लाइन डिफेन्डरहरूको समर्थनमा एन्टि आर्मर, एन्टि- एयरक्राफ्ट प्रणाली र साना हतियारहरूसमेत समावेश हुनेछन् ।' अमेरिका लगायत अन्य खासगरी नेटो देशहरुले युक्रेनलाई हतियार आपूर्ति गरिरहेका बेला रुसले कडा धम्कीजन्य चेतावनी दिएको हो ।

यसबीच, रुसी सेना युक्रेनको राजधानी किभ नजिकै पुगेर आक्रमण सशक्त बनाइरहेको छ । युक्रेनका राष्ट्रपति भोलोदिमिर जेलेन्स्कीले रुसी सेनालाई राजधानी किभ कब्जा गर्न खोजेमा मृत्युको सामना गर्ने चेतावनी दिएका छन् ।

नेटोका महासचिव जेन्स स्टोल्टेनबर्गले युक्रेन आक्रमणका क्रममा रुसले रासायनिक हतियार प्रयोग गर्न सक्ने चेतावनी दिएका छन् । उनले यस्तो कदम युद्ध अपराध हुने जर्मन अखबार वेल्ट एम सोनटागमा दिएको अन्तर्वार्तामा उल्लेख छ ।

युक्रेनका प्रमुख खारखिभ, मारिउपोल, माइकोलाइभ, डिनिप्रो, चेर्निहाइभ र सुमी सहर निरन्तर रुसी आक्रमणमा छन् । अहिले रुसी सेनाले युक्रेनमा आफ्नो आक्रमणलाई पश्चिममा विस्तार गरिरहेको छ । हाम्राकुरा/ एजेन्सी

प्रकाशित मिति: आइतबार, फागुन २९, २०७८ १३:०९