प्रतिवद्धता पत्रलाई टेकेर काम गर्ने गठबन्धनका साझा उम्मेदवार विष्ट र राईको जोड

स्थानीय

गृहपृष्ठ
स्थानीय
प्रतिवद्धता पत्रलाई टेकेर काम गर्ने गठबन्धनका साझा उम्मेदवार विष्ट र राईको जोड

प्रतिवद्धता पत्रलाई टेकेर काम गर्ने गठबन्धनका साझा उम्मेदवार विष्ट र राईको जोड

शुक्रबार, वैशाख २३, २०७९ बागेश्वरी पोस्ट

नेपालगन्ज । नेपालगन्ज उपमहानगरपालिकामा गठबन्धनका तर्फबाट नगर प्रमुख पदका उम्मेदवार प्रशान्त विष्ट र उपप्रमुखका उम्मेदवार कमरुद्धिन राईले प्रतिवद्धतालाई टेकेर निर्वाचित भएपछि काम गर्नेमा जोड दिएका छन् ।

नेपालगन्ज उपमहानगरपालिकामा गठबन्धनका तर्फबाट उपप्रमुखको प्रतिवद्धता सार्वजनिक कार्यक्रमलाई आज बेलुकी सम्बोधन गर्दै दुबै उम्मेदवारले यस्तो बताए ।

कार्यक्रमलाई सम्बोधन गर्दै नगर प्रमुख पदका उम्मेदवार विष्टले आफूहरुले जनतामाझ गरेका घोषणा र प्रतिवद्धता पत्रमा उल्लेख भएका कुरालाई कार्यान्वयन गर्ने बताए । संविधान बचाउनका लागि पाँच दलीय गठबन्धन बनेको स्मरण गर्दै उनले नेपालगन्ज उपमहानगरपालिकाको नगर प्रमुख पदमा रुख चिन्ह र उपप्रमुखमा छाता चिन्हमा मतदान गरेर दुबैलाई जिताउन अपिल गरेका छन् । दुबैले नेपालगन्जको विकासका लागि जनताको सेवक भएर काम गर्ने बताए ।

यस्तै नगर उपप्रमुख पदका उम्मेदवार राईले नेपालगन्ज उपमहानगरपालिकामा एमाले र राप्रपालाई ढाल्नका निम्ति नेपाली कांग्रेस, नेकपा (माओबादी केन्द्र), जनता समाजवादी पार्टी(जसपा), नेकपा (एकिकृत समाजवादी) र राष्ट्रिय जनमोर्चा पार्टीबीच संयुक्त रुपमा गठबन्धन बनेको स्पष्ट पारे । ‘बैशाख ३० गतेका दिन दुई तिहाई बहुमतका साथ यो गठबन्धन निर्वाचित हुन्छ,’ उनले भने ।

जनता समाजवादी पार्टी नेपालगन्ज उपमहानगरपालिकाका अध्यक्ष सर्वनकुमार यादवको सभापतित्वमा सम्पन्न कार्यक्रमलाई पूर्व मन्त्री एवम् बाँके क्षेत्र नम्बर २ का प्रतिनिधिसभा सांसद मोहम्मद इस्तियाक राई, नेपाली कांग्रेस नेपालगन्ज उपमहानगरपालिका निर्वाचन परिचालन समितिका संयोजक डा. सुरेशकुमार कनोडिया, नेपालगन्ज उपमहानगरपालिकाका उपप्रमुख उमा थापा मगर लगायतले सम्बोधन गरेका थिए ।

प्रतिवद्धता पत्रमा शिक्षा, कृषि, महिला बालबालिका तथा जेष्ठ नागरिक, रोजगारी, स्वास्थ्य, युवा तथा खेलकुद, खानेपानी तथा सरसफाई, सँस्कृति तथा पर्यटन, भूमी तथा आवास, भौतिक पूर्वाधार, भ्रष्टाचार नियन्त्रण तथा सुशासन र अपांगता सम्बन्धि विषयलाई बुँदागत रुपमा समावेश गरिएको छ ।

प्रकाशित मिति: शुक्रबार, वैशाख २३, २०७९ २०:५४

प्रतिक्रिया दिनुहोस्