कांग्रेसमा बिबाद, केन्द्रिय समिती बैठक दुईतिर

राजनीति

गृहपृष्ठ
राजनीति
कांग्रेसमा बिबाद, केन्द्रिय समिती बैठक दुईतिर

कांग्रेसमा बिबाद, केन्द्रिय समिती बैठक दुईतिर

शुक्रबार, पुस १८, २०७६ बागेश्वरी पोस्ट

कांग्रेस मुख्यालय

काठमाडौं। प्रमुख प्रतिपक्षी दल नेपाली कांग्रेसभित्रको विवाद झनै झांगिँदै गएको छ । केन्द्रीय समितिबाट भएको बहुमतको निर्णयलाई लिएर संस्थापन र इतर समूहबीच पछिल्लो समय विवाद झनै बढेको हो ।

केन्द्रीय समितिबाट भएको बहुमतको निर्णयलाई लिएर कांग्रेसभित्रको असन्तुष्ट समूहको समानान्तर बैठक नै बसेको छ । सभापति शेरबहादुर देउवाले २१ पुसको बैठकबाट फागुनमा चार वर्षे म्याद सकिन लागेको केन्द्रीय समितिको कार्यकाल एक वर्ष थप गर्ने निर्णय गरेका थिए । यस्तै, सोही बैठकबाट १४औं महाधिवेशन २०७७ फागुनमा गर्ने निर्णय बहुमतबाटै गरिएको थियो ।

यसैगरी, पार्टीका केन्द्रीय विभागको संख्या २८ बाट बढाएर ४७ बनाउने, तरुण दलको म्याद ६ महिना थप गर्नेलगायतका निर्णय पनि सोही बैठकबाट भएको थियो । संस्थापन समूहले पेलेर निर्णय गरेपछि कांग्रेसभित्रको इतर समूह मानिएको वरिष्ठ नेता रामचन्द्र पौडेलनिकट समूह संस्थापनले बोलाएका कुनै पनि बैठकमा सहभागी भएका छैनन् । सभापति देउवाले राष्ट्रिय सभातर्फ रिक्त हुन लागेका १८ सांसदका लागि ९ माघमा हुने निर्वाचनमा आफ्ना तर्फबाट उम्मेदवारबारे छलफल गर्न भन्दै बिहीबारका लागि बोलाएको केन्द्रीय समिति बैठकमा समेत असन्तुष्ट मानिएको पौडेल समूह सहभागी भएन ।

असन्तुष्टको जिल्ला सभापति भेला २१ गते

सो विषयमा पार्टी केन्द्रीय कार्यालय सानेपामा संस्थापन समूहको बैठक चलिरहँदा पौडेल पक्षीय नेताहरू भने महाराजगन्जस्थित महामन्त्री डा शशांक कोइरालाको निवासमा सामानान्तर बैठक चलाइरहेका थिए ।

पार्टी कार्यालयमा बसेको बैठकले उम्मेदवारबारे निर्णय गर्ने अधिकार पदाधिकारीलाई जिम्मा दिएको प्रवक्ता विश्वप्रकाश शर्माले जानकारी दिए। इतर पक्षको बैठकले भने २१ पुसमा जिल्ला सभापतिहरूसँग परामर्श गर्ने निर्णय गरेको केन्द्रीय सदस्य नवीन्द्रराज जोशीले जानकारी दिए । उनले सबै जिल्लाका जिल्ला सभापतिलाई बोलाएको समेत बताए। यसैगरी, शुक्रबार (आज) आफ्नातर्फबाट संघीय संसद्मा प्रतिनिधित्व गर्ने सांसदसँग पार्टीभित्रको पछिल्लो अवस्थाका विषयमा छलफल गर्ने निर्णय भएको समेत जोशीले जानकारी दिएका छन् । इतर पक्षको बिहीबारको बैठकमा वरिष्ठ नेता पौडेल, महामन्त्री कोइराला, पूर्वमहामन्त्री प्रकाशमान सिंह, कोषाध्यक्ष सीतादेवी यादव, नेता अर्जुननरसिंह केसीलगायतका नेता सहभागी थिए ।

सिटौला पक्षका नेता सानेपामा

बहुमतको निर्णयको विषयमा असन्तुष्ट रहँदै आएका नेता कृष्णप्रसाद सिटौला समूहका केही केन्द्रीय सदस्य भने पार्टी केन्द्रीय कार्यालय सानेपामा बसेको केन्द्रीय समिति बैठकमा सहभागी भएका छन् । सिटौला पक्षका केन्द्रीय सदस्य उमाकान्त चौधरी र शिवप्रसाद हुमागाईं सानेपामा बसेको केन्द्रीय समिति बैठकमा सहभागी भएका हुन् । तर, नेता सिटौलासहित गगन थापा र प्रदीप पौडेल भने दुवैतर्फका बैठकमा सहभागी भएनन् ।

सिटौलाले सभापति देउवालाई यसअघि नै भेटेर लिखितपत्रमार्फत बुहमतको बलमा गरिएको निर्णय फिर्ता लिन आग्रह गरिसकेका छन् । उनले सभापति देउवालाई गुटको नभई सिंगो पार्टीको सभापति बन्न र पार्टीका निर्णय गर्दा उदारता देखाउन भनेका छन् । तर, उनी पक्षका नेताहरू भने बैठकमा सहभागी भएका हुन् । यसैगरी, पौडेल पक्षीय नेता नरहरि आचार्य र गोविन्द भट्टराई पनि सानेपा बैठकमा सहभागी भएको स्रोतले बतायो ।

नेता आचार्यले भने गुटगत आधारमा पार्टी कार्यालयबाहिर आयोजना हुने बैठकमा आफू सहभागी नहुने तर पार्टी कार्यालयभित्र हुने बैठकमा भने सहभागी हुने प्रतिक्रिया दिए । उनले पार्टी कार्यालयमा बसेर नै बृहत् छलफलमार्फत समाधान खोजिनुपर्ने बताए ।राजधानी दैनिकबाट।

प्रकाशित मिति: शुक्रबार, पुस १८, २०७६ ०९:३९