पाप धुरीबाट कराउँछ, बागेश्वरी माताको नगरीमा जनताले बदला लिएः राई

स्थानीय

गृहपृष्ठ
स्थानीय
पाप धुरीबाट कराउँछ, बागेश्वरी माताको नगरीमा जनताले बदला लिएः राई

पाप धुरीबाट कराउँछ, बागेश्वरी माताको नगरीमा जनताले बदला लिएः राई

शनिबार, जेठ ७, २०७९ बागेश्वरी पोस्ट

नेपालगञ्ज । जनता समाजवादी पार्टी (जसपा) नेपालका नेता एवम् पूर्व मन्त्री मो. इस्तियाक राईले अबको पाँच वर्षलाई नेपालगञ्जको विकासमा लगानी गर्न आग्रह गरेका छन् । नेपालगञ्जमा गठबन्धनका तर्फबाट नवनिर्वाचित मेयर प्रशान्त विष्ट र उपमेयर कमरुद्दिन राईको विजय उत्सबपछि आयोजित सभालाई त्रिभुवन चोकमा सम्बोधन गर्दै उनले विगतको स्थानीय सरकारले प्रभावकारी काम गर्न नसकेको भन्दै अब नवनिर्वाचित मेयर, उपमेयर लगायत सबै जनप्रतिनिधिहरुले जनआकांक्षा अनुरुप काम गर्ने विश्वास व्यक्त गरे । जनताको घरघरमा आधारभूत सेवा पु¥याउने गरी कुनै कसर बाँकी नराखेर काम गर्न उनले आग्रह गरे ।

नेपालगञ्जका यसअघिका मेयर डा. धवलशमशेर राणाप्रति इंगित गर्दै उनले आफूले नेपालगञ्जको विकासका लागि ल्याएका योजना फर्काएर नेपालगञ्जको विकास अबरुद्ध गरेको बदला जनताले मतमार्फत् प्रकट गरेको जिकिर गरे । उनले सुर्खेतमा भएको गाईकाण्ड र भेन्टिलेटर खरिद गर्न संसद विकास कोषमार्फत् आएको पैसा फर्काइदिएको भन्दै गाई हत्या र भेन्टिलेटर खरिद नगरेर जनताको जीवनमाथि खेलबाद गर्नेलाई माता बागेश्वरीको नगरीमा पाप धुरीबाट कराउँछ भनेझै आक्रोशित जनताले मतमार्फत् विस्थापित गरिदिएको टिप्पणी गरे । बाँके क्षेत्र नम्बर २ को सांसद समेत रहेका राईले संघ र प्रदेशमा गठबन्धनकै सरकार भएकाले नेपालगञ्जसंग समन्वय गर्दै सबै मिलेर विकास गर्ने बताए । उनले गरिबदुःखीहरुको गुणस्तरीय शिक्षामा पहुँच, भूमीहिनहरुको पुनर्वास र किसानहरुका हकमा एकीकृत सम्पत्ति करको पुनरावलोकन लगायतका विषयहरुमा नयाँ नेतृत्वले ध्यान दिनुपर्ने सुझाब दिए ।

सभालाई कांग्रेस नेता सुदिपनरसिंह राणाले पनि सम्बोधन गर्दै पाँच दलीय गठबन्धन मुलुकको आवश्यकता भएको भन्दै स्थानीय चुनावमा नेपाली जनताले त्यसको अनुमोदन गरेकाले अब गठबन्धन धेरै अगाडिसम्म जाने बताए । नेपालगञ्जबासीले गठबन्धनका उम्मेदवाहरुप्रति ठूलो आशा र विश्वास देखाएको भन्दै उनले त्यो आशा र विश्वासलाई यथार्थमा बदल्न नवनिर्वाचित जनप्रतिनिधिहरु सफल हुने विश्वास व्यक्त गरे ।

कार्यक्रमको सञ्चालन नेपाली कांग्रेस बाँकेका सचिव सुधांशु कोइरालाले गरेका थिए ।