आफ्नो बद्नाम गर्न खोज्ने शिक्षकमाथि कारवाही गर्न डुडुवाका अध्यक्षको माग

स्थानीय

गृहपृष्ठ
स्थानीय
आफ्नो बद्नाम गर्न खोज्ने शिक्षकमाथि कारवाही गर्न डुडुवाका अध्यक्षको माग

आफ्नो बद्नाम गर्न खोज्ने शिक्षकमाथि कारवाही गर्न डुडुवाका अध्यक्षको माग

शुक्रबार, जेठ २०, २०७९ बागेश्वरी पोस्ट

डुडुवा (बाँके) । डुडवा गाउँपालिकाका अध्यक्ष नरेन्द्र कुमार चौधरीले गाउँपालिकाका एक शिक्षकले आफूलाई बद्नाम गर्न खोजेको भन्दै कारवाहीको माग गरेका छन् । उनले आज एक प्रेस विज्ञप्ती निकालेर ती शिक्षकले गलत तथा भ्रामक प्रचारवाजी गरेको स्पष्ट पारेका हुन् ।

जेठ १८ गते नेपाल राष्ट्रिय शिक्षक संगठन बाँकेले 'श्री आधारभुत विद्यालय डुडुवा–१ चौफेरीका शिक्षक भुपेन्द्र रेग्मीलाई डुडुवा गाउँपालिकाका अध्यक्ष चौधरीले ज्यान मार्ने धम्की दिएको' भन्दै प्रकाशित गरेको विज्ञप्तीप्रति उनले आफ्नो गम्भीर ध्यानाकर्षण भएको जनाएका छन् । अध्यक्ष चौधरीले गाउँपालिकालाई नै बद्नाम गर्ने गरी गलत प्रचारवाजी गर्ने संगठन तथा व्यक्तिका बारेमा स्पष्ट धारणा बुझी कडा कारवाही गर्न माग गरेका हुन् ।

अध्यक्ष चौधरीले विज्ञप्तीमा भनेका छन्– “मलाई निज शिक्षक रेग्मीले आफैं पटक पटक राजनीतिक विषयलाई लिएर वादविवाद गर्न खोजेको तर मैले सो विषयमा कुनै वास्ता नगरी निज शिक्षक रेग्मी विद्यालयको समयमा प्रायः बाहिर रहेर राजनीतिक गतिविधिमा सक्रिय देखिएपछि मिति २०७९ जेठ १८ गतेका दिन विद्यालयको समयमा भएको भेटका क्रममा रेग्मीलाई तपाईं विद्यालयको समयमा अन्यत्र स्थानमा जाने राजनीति गर्ने, यो राम्रो कुरा होइन र विद्यालयको समयमा उपस्थित भई अध्यापनमा विशेष ध्यान दिने कुरा मात्र गरेको तर उक्त कुरालाई तोडमोड गरी मेरो अध्यक्ष पदको गरिमामाथि समेत खिल्ली उडाएर व्यक्तिगत चरित्र हत्या गर्ने किसिमको शब्द प्रयोग गरी प्रकाशित विज्ञप्तीप्रति घोर आपत्ति छ ।”

उनले गाउँपालिका अन्तर्गत् कार्यरत अरु शिक्षकहरुलाई आफूले केही नभनी रेग्मीलाई मात्रै भन्न जरुरी नरहेको स्पष्ट पार्दै आफूसंग व्यक्तिगत केही कुरा गर्नुपर्ने भएमा जहिले पनि संवाद गर्न सकिने उल्लेख गरेका छन् । गाउँपालिकाका सम्पूर्ण शिक्षकहरुलाई विद्यालयको समयमा इमान्दारितापूर्वक आफ्नो पठनपाठनको कार्यमा जिम्मेवारी वहन गर्न अनुरोध गर्दै उनले गाउँपालिकालाई नै बद्नाम गर्ने गरी गरिने यस्ता क्रियाकलापले ठूलो आँच आउने बताएका छन् । अध्यक्ष चौधरीले संगठनको तर्फबाट गलत, अपुष्ट तथा एकोहोरो रुपमा अरुलाई तिरस्कृत र मानहानी गर्ने किसिमको कुरा बाहिर आएको घटनालाई आवश्यक छानविन गरी दोषीलाई कडा कारवाही गर्न स्थानीय प्रशासनसंग माग गरेका छन् ।

शिक्षक रेग्मीसंग आफ्नो कुनै पनि विवाद नरहेको स्पष्ट पार्दै अध्यक्ष चौधरीले आफ्नो काम, कर्तव्य र जिम्मेवारीमा लाग्न आग्रह गरेका छन् । गाउँपालिकाका सम्पूर्ण शिक्षकहरुलाई नियम कानुनभित्र रही आफनो कार्यसम्पादन गर्न विज्ञप्तीमार्फत् उनले निर्देशन समेत दिएका छन् ।

No description available.