नेपालगञ्जमा ढल र नालाको सरसफाई चल्दै

स्थानीय

गृहपृष्ठ
स्थानीय
नेपालगञ्जमा ढल र नालाको सरसफाई चल्दै

नेपालगञ्जमा ढल र नालाको सरसफाई चल्दै

शुक्रबार, असार ३, २०७९ बागेश्वरी पोस्ट

नेपालगञ्ज । वर्षातको समयमा ढल र नाला थुनिएर नेपालगञ्ज जलमग्न हुने देखिएपछि यहाँ ढल र नालाको सरसफाई गर्न थालिएको छ । ढल र नालामा फोहर थुप्रिएर पानीको निकास नहुँदा स्थानीयवासीले सास्ती खेप्नुपरेकाले केही ठाउमा दैनिक ज्यालादारीमा जनशक्ति परिचालन गरेर र केही ठाउँमा जेसिभीमार्फत् सरसफाईको काम सुरु गरिएको नेपालगञ्ज उपमहानगरपालिकाले जनाएको छ ।

केही वडाका नालामा वडा कार्यालयमार्फत् काम सुरु भएको छ । उपमहानगरको पहिलो प्राथमिकतामा ठूला र मझौला नाला सफाइलाई राखिएको उल्लेख गर्दै उपमहानगरको वातावरण तथा सरसफाई शाखाका प्रमुख इन्जिनियर प्रकाश डिसीले बसपार्कबाट पूर्व, गणेशपुर, बागेश्वरी मन्दिर हुँदै सुर्खेत राजमार्ग आसपास ढल र नाला सरसफाई गरिने जानकारी दिए । जेसिभी लगायत साधनमार्फत् नालीको प्लाष्टिकजन्य वस्तु, ढुङ्गा, इँटा, झार, फोहर र लेदो हटाउन थालिएको छ । ढल तथा नाला सरसफाईका लागि १० लाख बजेट विनियोजन गरिएको छ । वर्षाको समयमा पानी परे पनि डुबानको समस्या कम हुने उल्लेख गर्दै डिसीले सरसफाईको काम सकिन करिब एक महिना लाग्ने बताए ।

उपमहानगरपालिकामा ढल र नालाको समस्या समाधान गर्न केही दिनअघि नगरप्रमुख प्रशान्त विष्टले निर्देशन दिए लगत्तै ढल तथा नाला सफाई कार्य सुरु गरिएको थियो । नेपालगञ्ज बजारबाट मात्रै दैनिक २५ टन फोहरमैला सङ्कलन हुने गरेको छ । उक्त फोहरमैला उपमहानगरपालिकाको वडा नम्बर २३ स्थित हिरमििनियामा व्यवस्थापन हुँदै आएको छ ।

प्रकाशित मिति: शुक्रबार, असार ३, २०७९ १७:२६

प्रतिक्रिया दिनुहोस्