संवाद समूहद्वारा सरोकारवालासँग स्थानीय तह निर्वाचनको समीक्षा

स्थानीय

गृहपृष्ठ
स्थानीय
संवाद समूहद्वारा सरोकारवालासँग स्थानीय तह निर्वाचनको समीक्षा

संवाद समूहद्वारा सरोकारवालासँग स्थानीय तह निर्वाचनको समीक्षा

बिहीबार, असार ९, २०७९ बागेश्वरी पोस्ट

नेपालगञ्ज । स्थानीय तह निर्वाचन २०७९ को समग्र समीक्षा गरिएको छ । संवाद समूह बाँकेले आज नेपालगञ्जमा बैशाख ३० गते सम्पन्न स्थानीय तह निर्वाचनको सरोकारवालासँग समिक्षात्मक अन्तरक्रिया गरेको हो ।

निर्वाचन शान्तिपूर्ण, भयरहित र सफल बनाउन चरणवद्ध संवाद सहजीकरण गरेको समूहले निर्वाचनसँग प्रत्यक्ष सम्बन्धित निर्वाचन अधिकारी, सुरक्षा अधिकारी, निर्वाचन पर्यवेक्षक, अधिकारकर्मी, नागरिक अगुवामाझ निर्वाचन अघि, मतदान अवधि र मतगणना घोषणा सम्मको समग्र समीक्षा गरेको हो ।

स्थानीय तह निर्वाचनमा पर्यवेक्षणमा खटिएका नियोकका बसन्त गौतमले सहज पहुँच र सुरक्षाको दृष्टिकोणलाई मध्यनजर गर्दै मतदान केन्द्र परिवर्तन गर्नुपर्ने सुझाव दिए । नेपालगञ्ज उपमहानगरपालिकाकी निवर्तमान उपप्रमुख उमा थापा मगरले मतदाता शिक्षा अभावकै कारण धेरै मत वदर भएको भन्दै गठवन्धन र चुनाव चिन्हको अन्यौलताले पनि मतदाता झुक्किएको बताइन् ।राष्ट्रिय अपांग महासंघका संघीय सचिव भावुकजंग थापाले असशक्त, अपाङ्ग तथा जेष्ठ नागरिकको सहज पहुँचलाई ध्यान नदिइएको भन्दै आगामी निर्वाचनहरुमा सुधार हुनुपर्नेमा जोड दिए ।

No description available.

बाँकेका प्रमुख जिल्ला अधिकारी सूर्य बहादुर खत्रीले शन्तिसुरक्षा र आचारसंहिता पालनालाई प्राथमिकता दिइएकोले निर्वाचन शान्तिपूर्ण र सफल भएको बताए । मतदान भन्दा मतगणना गर्न धौधौ भएको उनले स्वीकारे । जिल्ला निर्वाचन कार्यालय बाँकेका प्रमुख एवं निर्वाचन अधिकारी रमा पन्तले निर्वाचन अधिकृतसँगको समन्वयमै निर्वाचन गरिएको भन्दै मतदाता शिक्षालाई थप प्रभावकारी बनाइनुपर्ने आवश्यकता महसुस भएको बताइन् । जिल्ला प्रहरी कार्यालय बाँकेका प्रहरी प्रमुख श्यामकृष्ण अधिकारीले सुरक्षा अधिकारी, दल र नागरिक समाज बीचको समन्वय र सहकार्यले निर्वाचनमा अप्रिय घटना नभएको विश्वास व्यक्त गरे ।

सहभागी अधिकांशले मतदान र मतगणना झन्झटिलो भएकाले अव इलेक्ट्रिक भोटिङ मेसिनको प्रयोग गर्ने नीतिको ब्यवस्था गरिनुपर्ने, आचारसंहितामा कडाई गरिनुपर्ने, सूचनाको सहज प्रवाह गरिनुपर्ने लगायत सुझाव दिएका थिए । संवादका सहजकर्ता शुक्रऋषि चौलागाईद्वारा सहजीकरण गरिएको कार्यक्रममा इन्सेकका प्रदेश संयोजक भोला महत, नेपाल बार एशोसियसनका पूर्व वरिष्ठ उपाध्यक्ष सुनिल श्रेष्ठ, सशस्त्र प्रहरी उपरीक्षक जनकराज बस्नेत, सूचना तथा मानव अधिकार अनुसन्धान केन्द्रका अध्यक्ष विश्वजित तिवारी, अधिकारकर्मी प्रकाश उपाध्याय, मुस्लिम युवा अगुवा एवं संवाद समूहका सदस्य मकबुल मुकेरी, पत्रकार मधु पौडल लगायतले पनि आ-आफनो राय सुझाव राखेका थिए ।

प्रकाशित मिति: बिहीबार, असार ९, २०७९ १९:४७

प्रतिक्रिया दिनुहोस्