बाँकेमा बढ्दै लागूऔषधको प्रयोग र कारोबारी

स्थानीय

गृहपृष्ठ
स्थानीय
बाँकेमा बढ्दै लागूऔषधको प्रयोग र कारोबारी

बाँकेमा बढ्दै लागूऔषधको प्रयोग र कारोबारी

ट्याब्लेटको कारोबार दोब्बरले बढ्यो

आइतबार, असार १२, २०७९ बागेश्वरी पोस्ट

नेपालगञ्ज । बाँकेमा लागूऔषधजन्य पदार्थ बरामद र लागूऔषध मुद्दा बढ्दै गएको छ । जिल्लामा लागूऔषध पदार्थको सेवन गर्ने र कारोबारी बढी भएकाले यस्ता मुद्दामा वृद्धि भएको हो ।

जिल्ला प्रशासन कार्यालय बाँकेका अनुसार चालू आर्थिक बर्षको असार पहिलो सातासम्म यस्ता अभियोगमा १८५ जना पक्राउ परेका छन् । ती मध्येमा १७५ पुरुष र १० महिला छन् ।

बाँकेका सहायक प्रमुख जिल्ला अधिकारी टोपेन्द्र बहादुर केसीले लागूऔषध दुरुपयोग तथा ओसारपसारविरुद्धको अन्तर्राष्ट्रिय दिवसको अवसर पारेर यसको माग घटाउने अभियान र वितरणमा नियन्त्रण गर्नका लागि जनचेतनामूलक कार्यक्रम सञ्चालन गरिने बताए ।

उनले लागूऔषधको कारोबार र सेवनलाई निरुत्साहित गर्न आवश्यक भएको उल्लेख गर्दै विद्यालय केन्द्रित कार्यक्रम र लागूऔषध जोखिम न्यूनीकरण गर्नुपर्ने बताए ।

गत आर्थिक वर्षमा बाँकेमा कुल १९६ पक्राउ परेका थिए । ती मध्ये १८५ पुरुष र ११ महिला रहेकामा १२६ लाई मुद्दा चलाइएको थियो । पछिल्लो तथ्याङ्क अनुसार जिल्लामा ट्याब्लेटको कारोबार बढेको देखिएको छ । गत वर्ष भन्दा चालू आर्थिक बर्षमा नाइट्रोसन र ट्रामाडोल दोब्बर बढी बरामद गरिएको छ ।

गत आर्थिक बर्षमा ब्राउन सुगर ५७० ग्राम, चरेस २० दशमलव तीन केजी, अफिम ३४ दशमलव ५७४ केजी, गाँजा ६८ दशमलव ४३ केजी, कोरेक्स ३९ दशमलव चार लिटर, नाइट्रोसन एक हजार ३१० ट्याब्लेट र ट्रामाडोल एक हजार ७० ट्याब्लेट बरामद गरिएको सहायक प्रमुख जिल्ला अधिकारी केसीले जानकारी दिए ।

उनका अनुसार चालू आर्थिक बर्षको असार पहिलो सातासम्म ब्राउनसुगर ८९० दशमलव ९९ ग्राम, चरेस १४ दशमलव १५८ केजी, गाँजा २४ दशमलव २८ केजी, कोरेक्स आठ दशमलव चार लिटर, नाइट्रोसन चार हजार २५ ट्याब्लेट र ट्रामाडोल दुई हजार ४३० ट्याब्लेट बरामद हुँदा अफिम भने बरामद भएको छैन ।

जिल्लामा २० पुनःस्थापना केन्द्रमा अहिले ३१२ जनाको उपचार भइरहेको छ । उनीहरु २० देखि ५४ वर्षसम्मका छन् । निःशुल्क परामर्श केन्द्रमा नौ जनाले सेवा लिइरहेका छन् ।

प्रकाशित मिति: आइतबार, असार १२, २०७९ ०९:००

प्रतिक्रिया दिनुहोस्