डुडुवा गाँउपालिकामा कार्यपालिका बैठक सञ्चालन गर्न समस्या

स्थानीय

गृहपृष्ठ
स्थानीय
डुडुवा गाँउपालिकामा कार्यपालिका बैठक सञ्चालन गर्न समस्या

डुडुवा गाँउपालिकामा कार्यपालिका बैठक सञ्चालन गर्न समस्या

शनिबार, असार १८, २०७९ बागेश्वरी पोस्ट

डुडुवा (बाँके) । बाँकेको डुडुवा गाँउपालिकामा कार्यपालिका बैठक सञ्चालन गर्न समस्या भएको छ । अध्यक्ष नरेन्द्रकुमार चौधरीले आज प्रेस विज्ञप्ती जारी गरी नेकपा एमाले र जनता समाजबादी पार्टी (जसपा) नेपालले कार्यपालिकामा आफ्नो बहुमतको आडमा बैठक अवरोध गर्दै आएपछि बैठक सञ्चालन गर्न समस्या भएको उल्लेख गरेका छन् ।

स्थानीय सरकार सञ्चालन ऐन २०७४ र डुडुवा गाउँपालिका बैठक सञ्चालन कार्यविधि २०७४ अनुसार कार्यपालिका बैठकमा प्रस्तुत हुने प्रस्तावहरु अध्यक्षबाट स्वीकृत गराई प्रमुख प्रशासकीय अधिकृतले कार्यपालिकाको बैठकमा सचिवको हैसियतले एजेण्डा प्रस्तुत गर्नुपर्र्ने कानूनी व्यवस्था रहको र उक्त कानुनी व्यवस्थालाई अध्ययन नै नगरी कार्यसूची विपरीत एकैपटक विभिन्न विषयहरुमा छलफल गर्दा बैठक सञ्चालन गर्नमा कठिनाई उत्पन्न भएको विज्ञप्तीमा उल्लेख गरिएको छ ।

No description available.

विज्ञप्तीमा भनिएको छ, "कार्यपालिकाको जेठ ३० गते बसेको पहिलो बैठकमा धन्यवादसहितको प्रस्ताव पास भएर सम्पन भएको, दोस्रो बैठक असार ६ गते र तेस्रो बैठक असार १२ गते बसेको बैठकमा कानुन अनुसार अध्यक्षबाट पेश हुने प्रस्ताव पेश गरिएको विषयमा छलफल नगरी अनावश्यक विषयमा वादविवाद गरी प्रस्तुत प्रस्तावमा छलफल नै गर्न नदिई कार्यपालिकाका सदस्यहरुले बाहिरी विषयको प्रस्ताव ल्याएर बहुमत भन्दै बैठक नै शुरु हुन नदिएको अवस्थामा गाउँपालिकाको नीति, कार्यक्रम र बजेट समेत अनिश्चित बनेको छ ।" कार्यपालिकाको पहिलो बैठक बाहेक अन्य दुई वटा बैठकमा विषय प्रबेश नभई स्थागित भएको अध्यक्ष चौधरीले बताएका छन् ।

कार्यपालिकाको बैठकका लागि फोन र एसएमएसमार्फत् सबै सदस्यहरुलाई खबर गरी बैठकको एजेण्डा समेत प्रस्तुत गरेर सभा सञ्चालन तथा विषयगत समितिको गठन बजेटको तयारी लगायतका विषयमा निर्णय गर्दा त्यसप्रति कुनै चासो नदिई अनावश्यक विवाद सृजना गरेकाले समस्या उत्पन्न भएको गाउँपालिका अध्यक्ष नरेन्द्र कुमार चौधरीले बताए । अध्यक्ष चौधरीले गाउँपालिकाको समग्र हितका लागि पहिला नीति, कार्यक्रम र बजेट ल्याउनुपर्ने भन्दै अनावश्यक वादविवाद नगर्न आग्रह गरेका छन् ।

एमाले र जसपाका निर्वाचित पदाधिकारीहरु बैठकमा उपस्थित भएर पनि प्रक्रिया अनुसार छलफलमा सहभागी नभएको र बाहिर विभिन्न किसिमका झुठा अफबाह फैलाउने तथा आरोप प्रत्यारोप लगाउने कार्य गलत भएको अध्यक्ष चौधरीले उल्लेख गरेका छन् । जनताले चुनेका जनप्रतिनिधिले काम गर्ने बातावरण नवनाउँदा अनाहकमा जनताले दुःख पाउने संकेत देखिएकोमा उनले चिन्ता व्यक्त गरेका छन् । कार्यपालिकाको बैठक नबस्दा गाउँपालिकाले प्रवाह गर्ने स्वास्थ्य, पशु, राजश्व शुल्क लगायतका विभिन्न सेवाहरु प्रभावित भएको भन्दै अध्यक्ष चौधरीले दुःख व्यक्त गरेका छन् ।

एमाले र जसपाले बहुमत भएको देखाउँदै कार्यपालिकाको बैठकमा हुल हुज्जतका साथ अन्य कार्यकर्ता समेत ल्याएर बैठक भाँड्ने कार्य भइरहेको भन्दै अध्यक्ष चौधरीले आगामी दिनमा त्यस्ता गतिविधि नगर्न आग्रह गरेका छन् ।

प्रकाशित मिति: शनिबार, असार १८, २०७९ १७:३३

प्रतिक्रिया दिनुहोस्