बाँकेमा तस्करीविरुद्ध सशस्त्र प्रहरीको धावा:आजै ठुलो परिमाणमा अवैध सामाग्री बरामद

स्थानीय

गृहपृष्ठ
स्थानीय
बाँकेमा तस्करीविरुद्ध सशस्त्र प्रहरीको धावा:आजै ठुलो परिमाणमा अवैध सामाग्री बरामद

बाँकेमा तस्करीविरुद्ध सशस्त्र प्रहरीको धावा:आजै ठुलो परिमाणमा अवैध सामाग्री बरामद

तस्करीविरुद्ध लाग्न सशस्त्र प्रहरी उपरीक्षक बस्नेतको निर्देशन

बिहीबार, साउन १२, २०७९ बागेश्वरी पोस्ट

नेपालगन्ज । सशस्त्र प्रहरीले तस्करीविरुद्ध धावा बोल्दै नेपालगन्जको सीमा नाकाबाट भन्सार छली गरेर नेपाल भित्र्याउँदै गरिएका ठुलो परिमाणका अवैध सामग्री बरामद गरेको छ ।

सशस्त्र प्रहरी बल नम्बर ३० गण बागेश्वरी बाँकेबाट सशस्त्र प्रहरी नायब निरीक्षक गणेश खत्रीको कमाण्डमा गएको टोलीले आज बिहान ५ बजे नेपालगन्ज १५ पिप्रहवाबाट झण्डै पौने ३ लाख रुपैयाँ बराबरका अवैध सामग्री बरामद गरेको सशस्त्र प्रहरी उपरीक्षक जनकराज बस्नेतले जानकारी दिएका छन् ।

तस्करीविरुद्ध कडा रुपमा प्रस्तुत हुँदै आएको सशस्त्र प्रहरीको टोलीले भन्सार छली गरेर ल्याउँदै गरिएका ठुलो परिमाणमा कपडा बरामद गरेको छ भने सोही टोलीले पिप्रहवा नजिकैबाट भारत लैजाँदै गरिएको ठुलो परिमाणमा धुलो सुपारी समेत बरामद गरेको हो ।

त्यस्तै बरामद गरिएका अन्य अवैध सामग्रीहरुमा किराना सामग्री, प्लास्टिकका भाडा, झ्याल-ढोकामा लगाउने कब्जा, खाद्यान्न, चिनी, लेडिजले प्रयोग गर्ने ठुलो परिमाणको कपडा लगायत रहेका छन् ।

बरामद गरिएका सबै २ लाख ७० हजार १५० रुपैयाँ बराबर अवैध बस्तु तथा सामग्रीलाई आबश्यक कारबाहीका लागि नेपालगन्ज भन्सार कार्यालय बुझाइएको सशस्त्र प्रहरी उपरीक्षक बस्नेतले जानकारी दिएका छन् ।

बाँकेको सीमा नाकामा अवैध तस्करीविरुद्ध कडाईका साथ लाग्न सशस्त्र प्रहरी उपरीक्षक बस्नेतको निर्देशन अनुसार सशस्त्र प्रहरीले बाँकेका सबै नाकामा अवैध ओसारपसारविरुद्धको अभियानमा लाग्दै दैनिक लाखौं रुपैयाँको सामग्री बरामद गर्दै आएको छ । सशस्त्र प्रहरीले सीमा नाकामा हुने अवैध गतिविधिमाथि समेत निगरानी बढाउँदै आएको छ ।