सामुदायिक वनका अध्यक्षद्वारा नै काठ तस्करी

समाचार

गृहपृष्ठ
समाचार
सामुदायिक वनका अध्यक्षद्वारा नै काठ तस्करी

सामुदायिक वनका अध्यक्षद्वारा नै काठ तस्करी

बुधबार, पुस २३, २०७६ बागेश्वरी पोस्ट

मसुरीया( कैलाली )। कैलालीमा एक सामुदायिक वनका अध्यक्षले नै संरक्षित राष्ट्रिय वनबाट काठ तस्करी गर्ने गरेको खुलासा भएको छ । गौरीगंगा नगरपालिका ७ मा रहेको सुनपाल सामुदायिक वनका अध्यक्ष डिल्लीराज जोशीले राष्ट्रिय वनबाट काठ तस्करी गर्ने गरेको खुलासा भएको हो ।

उनले राष्ट्रिय वनबाट अवैध रुपमा गोलिया काठ तस्करी गरेर मिलमा चिरान गर्ने गरेका छन् । वडा नम्बर ८ मा रहेको पवन जोशीको आरा मिलमा तस्करीको काठ चिरान हुने गरेको स्वयम् सामुदायिक वनकै उपभोक्ताको आरोप छ । सोमबार चिरान गर्नका लागि आरा मिलमा दुई थान गोलिया काठ पु¥याएका जोशीले त्यहाँ सामुदायिक वनका उपभोक्ता र पत्रकार पुगेपछि काठ लुकाएका छन् । जोशीले काठ तस्करी गर्ने गरेको खुलासा भएपछि उपभोक्ताहरु काठ चिरान गर्ने आरा मिलमा पुगेका थिए ।

आरा मिल पु¥याइएको काठ जनप्रिय माध्यमिक विद्यालयको रहेको अध्यक्ष जोशीले जिकिर गरे पनि विद्यालयले भने सो काठ आफ्नो नरहेको जनाएको छ । विद्यालयका प्रधानाध्यापक धनीप्रसाद भट्टले सामुदायिक वनका अध्यक्ष जोशीले आरा मिलमा पु¥याएको काठ विद्यालयको नरहेको बताए । ‘तस्करीको आरोप लागेपछि बच्नका लागि विद्यालयको नाम जोडेको हुनुपर्छ’, उनले भने–‘त्यो काठ विद्यालयको होइन ।’ जनप्रिय माध्यमिक विद्यालयले काठ आफ्नो नरहेको बताएपछि सामुदायिक वन उपभोक्ता समूहका अध्यक्ष जोशीले विद्यालयको नाम जोडेर काठ तस्करी गर्ने गरेको पुष्टि भएको छ । राष्ट्रिय वनबाट काठ तस्करी गर्ने जोशीको गैरकानुनीधन्दाले उपभोक्ता झस्केका छन् ।

वैज्ञानिक वन व्यवस्थापन कार्ययोजना लागू भएको क्षेत्रभन्दा बाहिर राष्ट्रिय वन क्षेत्रबाट काठ बेवारिसे बनाएर कार्यालय पछाडिको झाडीमा चिरान गरी जोशीले अन्यत्र काठ निर्यात गर्ने गरेको उपभोक्ता दिलबहादुर बोहराले आरोप लगाए । सामुदायिक वनको अध्यक्ष भएर संरक्षणको नाटक गर्ने जोशीले गैरकानुनीधन्दा गरिरहेको उनले उल्लेख गरे । जोशीले राष्ट्रिय वनबाट गोलिया काठ ल्याएको स्वीकारेका छन् । यसअघि, उनकै सामुदायिक वनमा पनि विवाद भएको थियो । सुनपाल सामुदायिक वन उपभोक्ता समूहको घाट गद्दीमा रहेको काठ उपभोक्तालाई माग अनुसार नदिएको भन्दै केही दिन पहिला सव डिभिजन वन कार्यालयमा उपभोक्ताले तालाबन्दी गरेका थिए । संरक्षणको अभिभारा बोकेको व्यक्ति राष्ट्रिय वनमा रहेको काठ तस्करीमा संलग्न हुनु दु्ःखद् रहेको स्थानीयको भनाइ छ ।

सुनपाल सामुदायिक वनका पूर्व अध्यक्ष गोपाल कलेलले सामुदायिक वनका पदाधिकारीले वन अधिकृतसंगको मिलेमतोमा राष्ट्रिय वन क्षेत्रबाट काठ तस्करी गरिरहेको आरोप लगाए । यसैगरी, सुनपाल सामुदायिक वनसंग जोडिएको खप्तड बहुमुखी क्याम्पसभन्दा पश्चिमतिर क्याम्पस किनारमा चिरानको लागि ठूलो परिमाणमा काठ लुकाइएको स्थानीय काशीराम बोहराले बताए । सामुदायिक वनकै अध्यक्षले काठ तस्करी गरिरहँदा नजिकै रहेको सव डिभिजन वन कार्यालयले भने वास्ता गरेको छैन । समितिका पदाधिकारीले सामुदायिक वनसँग जोडिएको राष्ट्रिय वनबाट बेवारिसे बनाई ठूलो परिमाणमा काठ तस्करी गरिरहँदा पनि वन कार्यालयले वास्ता नगर्नु दुःखद् रहेको कतिपयको भनाइ छ ।

उनीहरुले काठ तस्करीमा वनकै कर्मचारीको मिलेमतो रहेको आशंका गरेका छन् । यसैबीच, गौरीगंगा नगरपालिका मेयर एवम् सुनपाल सामुदायिक वनका पूर्व अध्यक्ष भीमबहादुर देउवाले काठ तस्करीमा संलग्नहरुमाथि कडा कारबाही हुनु पर्ने बताए । काठको गोलिया समितिका पदाधिकारीले तस्करी गरे÷नगरेको बारेमा बुधबारदेखि अनुसन्धान गर्ने मसुरिया सव डिभिजन वन कार्यालयका सहायक वन अधिकृत सचितान्नद सिंहले बताएका छन् ।

उनले आफ्नो टोलीले वन क्षेत्रमा निरिक्षण गरेर मुचुल्का उठाएको र सामुदायिक वन परिसर बाहेक अन्य ठाउँमा निरीक्षण गर्न नभ्याएको जवाफ दिए । यता, सामुदायिक वनका अध्यक्ष डिल्लीराज जोशीले आरा मिलमा लगेको काठ आफनो भएको स्वीकार्दै भने–‘जानेर वा अन्जानमा गल्ती भयो ।’ बेवारिसे काठको मुचुल्का उठाएको मुचुल्का हेर्न सामुदायिक वनको कार्यालयमा जाँदा समितिका कोषाध्यक्ष पर्शुराम चौधरीले समितिले विगतमा बनाएका मुचुल्का देखाउन तयार भएनन् ।

समाचार नलेख्न दबाब

राष्ट्रिय वनबाट काठ तस्करी गरेको खुलासा भएपछि तस्करीको आरोप लागेका सुनपाल सामुदायिक वनका अध्यक्ष जोशीले पत्रकारलाई समाचार नलेख्न दबाब दिएका छन् । उनले फोन गरेर पत्रकारलाई घटना बाहिर नल्याउन दबाब दिएका हुन ।पश्चिमटुडेबाट साभार।

प्रकाशित मिति: बुधबार, पुस २३, २०७६ ११:३९