नेपालगञ्जमा विद्यालय अनुगमन निरन्तर, निजीमा पनि पुगे नगर प्रमुख विष्ट

स्थानीय

गृहपृष्ठ
स्थानीय
नेपालगञ्जमा विद्यालय अनुगमन निरन्तर, निजीमा पनि पुगे नगर प्रमुख विष्ट

नेपालगञ्जमा विद्यालय अनुगमन निरन्तर, निजीमा पनि पुगे नगर प्रमुख विष्ट

बुधबार, साउन १८, २०७९ बागेश्वरी पोस्ट

नेपालगञ्ज । नेपालगञ्ज उपमहानगरपालिकाले शैक्षिक गुणस्तर सुधारका लागि सामुदायिकसँगै संस्थागत विद्यालयको पनि आकस्मिक अनुगमन थालेको छ ।

नगर प्रमुख प्रशान्त विष्ट गत सातादेखि आकस्मिकरुपमा विद्यालयहरुको अनुगमनमा निस्कने गरेका छन् । आज शिक्षा शाखा प्रमुख तथा निमित्त प्रमुख प्रशासकीय अधिकृत गोर्खबहादुर थापासहित नगर प्रमुख विष्टले बसुदेबपुरस्थित जगतज्योती माध्यमिक विद्यालय, महाराजा मावि पुरैना र जय बागेश्वरी माध्यमिक विद्यालयको अनुगमन गरे ।

जगतज्योती माविमा नियमित पठनपाठन राम्रो देखिएपनि विद्यालयमा प्राचार्य ईश्वर पौडेलसहित हाजिर रजिष्ट्ररमा अनुपस्थित ५ जना शिक्षकहरुलाई गयल गर्दै टोलीले समयमै विद्यालयमा पुगेर हाजिर गर्न निर्देशन दिएको छ । यसैगरी महाराजा माविमा विद्यार्थी र शिक्षकहरु कोठा बाहिर फेला परेपछि अनुगमन टोलीले नियमित पठनपाठनका लागि निर्देशन दिएको थियो ।

संस्थागत विद्यालयको रुपमा पहिलोपटक जय बागेश्वरीबाट टोलीले अनुगमन थालेको हो । सो क्रममा नगर प्रमुख विष्ट सहितको टोलीले विद्यालयको विभिन्न विषयको जानकारी लिएको थियो । टोलीले शौचालयसहित भौतिक अवस्था र छात्रवृत्तिका विषयमा जानकारी लिएको थियो । नगर प्रमुख विष्ट र शाखा प्रमुख थापा सम्मिलित अनुगमन टोलीले तीन वटै विद्यालयका विद्यार्थी तथा शिक्षकसँग समेत प्रत्यक्ष परामर्श गरेको थियो ।

नगरको सुधारका लागि शिक्षामा विशेष जोड दिइएको भन्दै नगर प्रमुख विष्टले शैक्षिक सुधार भएपनि अन्य क्षेत्रमा सुधार देखिने भएकाले शिक्षामा विशेष प्राथमिकता दिइएको बताए । उनले अनुगमन जुनसुकै समयमा र जुनसुकै विद्यालयमा पनि हुन सक्ने बताए । अनुगमनलाई निरन्तरता दिँदै विद्यालयहरुको आवश्यक सुधारका लागि पनि क्रमशः पहल गरिने नगर प्रमुख विष्टले बताए ।

गत सातादेखि सुरु भएको अनुगमनका कारण सामुदायिक विद्यालयमा सकारात्मक प्रभाव परेको देखिएको छ । नगर प्रमुख विष्टले आफूले बाल्यकालमा अध्ययन गरेको सामुदायिक विद्यालय महेन्द्र मावि र संस्थागत विद्यालय जयबागेश्वरीबाट अनुगमन सुरु गरेका हुन् ।

प्रकाशित मिति: बुधबार, साउन १८, २०७९ १६:१३

प्रतिक्रिया दिनुहोस्