भारतको बाराबंकीमा नेपाली सवार बस दुर्घटना, ४ जनाको मृत्यु,२४ घाइते

विश्व

गृहपृष्ठ
विश्व
भारतको बाराबंकीमा नेपाली सवार बस दुर्घटना, ४ जनाको मृत्यु,२४ घाइते

भारतको बाराबंकीमा नेपाली सवार बस दुर्घटना, ४ जनाको मृत्यु,२४ घाइते

शनिबार, भदौ १८, २०७९ बागेश्वरी पोस्ट

नेपालगन्ज । भारतको उत्तर प्रदेशको बाराबंकी जिल्लामा नेपाली नागरिक सवार भारतीय बस दुर्घटना हुँदा ४ जनाको घटनास्थलमै मृत्यु भएको छ ।

१५० जना यात्रु लिएर रुपइडिहाबाट गोवा जाँदै गरेको युपी ९३ बि.टि.९९४४ नम्बरको डबल डेकर बसको टायर पन्चर भएर बाराबंकी जिल्लाको रामनगर थाना क्षेत्रको महंगुपुर गाउँ नजिक रोकिराखिएको अवस्थामा आज बिहान करिव ३ः३० बजेतिर सोही दिशाबाट जाँदै गरेको ट्रकले ठक्कर दिँदा भयानक दुर्घटना भएको हो ।

उक्त दुर्घटनामा परी बाँकेको राप्तीसोनारी गाउँपालिका वडा नम्बर ५ का प्रेम थारु र सितल थारु थारु, तुलसीपुर उपमहानगरपालिका दाङका चक्र ओलीको घटनास्थलमै मृत्यु भएको बाराबंकी प्रहरीले जानकारी दिएको छ । दुर्घटनामा मृत्यु भएका अर्का एक जनाको पहिचान खुल्न सकेको छैन ।

दुर्घटनामा २४ जना घाइते मध्ये ६ जना गम्भीर घाइते भएका छन् । उनीहरुको लखनऊस्थित ट्रमा सेन्टरमा उपचार भइरहेको छ । अन्य सामान्य घाइतेहरुको जिल्ला अस्पताल बाराबंकीमा उपचार भइरहेको छ । दुर्घटनाग्रस्त बसमा सबै नेपाली सवार थिए । ठक्कर दिने ट्रक र चालकलाई बाराबंंकी प्रहरीले नियन्त्रणमा लिइसकेको छ ।

प्रकाशित मिति: शनिबार, भदौ १८, २०७९ १३:३९