नरैनापुरका किसानका लागि मन्त्री अथकद्वारा उर्जा र कृषि मन्त्रीसँग छलफल

स्थानीय

गृहपृष्ठ
स्थानीय
नरैनापुरका किसानका लागि मन्त्री अथकद्वारा उर्जा र कृषि मन्त्रीसँग छलफल

नरैनापुरका किसानका लागि मन्त्री अथकद्वारा उर्जा र कृषि मन्त्रीसँग छलफल

बिहीबार, भदौ २३, २०७९ बागेश्वरी पोस्ट

नेपालगन्ज । युवा तथा खेलकुद मन्त्री महेश्वर गहतराज (अथक) ले आफ्नो निर्वाचन क्षेत्रमा देखिएको समस्याको बारेमा उर्जा र कृषि मन्त्रीसँग छुट्टाछुट्टै छलफल गरेका छन् । बाँके क्षेत्र नं. १ को नरैनापुरमा देखिएको खडेरीको समस्याका बारेमा मन्त्री अथकले उर्जा, जलस्रोत तथा सिंचाई मन्त्री पम्फा भुसालसँग भेटेर छलफल गरेका हुन् ।

लामो समयदेदेखिको खडेरीका कारण नरैनापुरलाई सुख्खा क्षेत्र घोषणा गरिएको जानकारी गराउँदै मन्त्री अथकले त्यस क्षेत्रमा तत्काल डिप बोर्डिङको ब्यवस्था गरीदिन उर्जा मन्त्री भुसालसँग माग गरेका छन् । सुख्खा क्षेत्र घोषणा भएको नरैनापुरका नागरिकहरुलाई भोकमरीबाट बचाउन तत्काल आवश्यक पहल गर्नुपर्नेमा जोड दिँदै मन्त्री अथकले तत्कालका लागि डिप बोरिंग र दिर्घकालीन रुपमा सिक्टा सिंचाई आयोजनामार्फत् नरैनापुरका कृषकहरुलाई सिंचाईको ब्यवस्था गर्नेतर्फ उर्जा, जलस्रोत तथा सिंचाई मन्त्रालयले विशेष पहल गर्नुपर्ने बताए । जवाफमा उर्जा मन्त्री भुसालले सकारात्मक प्रतिक्रिया दिएकी छिन् ।

यसैबीच मन्त्री अथकले नै कृषि तथा पशुपन्छी विकास मन्त्री मृगेन्द्र कुमार सिंह यादवसँग भेटेर नरैनापुरका कृषकहरुका लागि तत्काल राहत प्याकेज ल्याउन आग्रह गरेका छन् । अर्थ मन्त्री र आफूले समेत त्यस क्षेत्रको स्थलगत निरिक्षण गरिसकेकाले तत्काल राहत प्याकेजको प्रस्ताव क्याबिनेटमा लैजान मन्त्री अथकले आग्रह गरेका हुन् ।

प्रकाशित मिति: बिहीबार, भदौ २३, २०७९ १२:५४

प्रतिक्रिया दिनुहोस्