बाल दिवसका अवसरमा नरैनापुरका उत्कृष्ट विद्यार्थीलाई ल्यापटप प्रदान

स्थानीय

गृहपृष्ठ
स्थानीय
बाल दिवसका अवसरमा नरैनापुरका उत्कृष्ट विद्यार्थीलाई ल्यापटप प्रदान

बाल दिवसका अवसरमा नरैनापुरका उत्कृष्ट विद्यार्थीलाई ल्यापटप प्रदान

बुधबार, भदौ २९, २०७९ बागेश्वरी पोस्ट

नरैनापुर (बाँके) । बाँकेको नरैनापुर गाउँपालिकाले २६ उत्कृष्ट विद्यार्थी तथा विद्यालयलाई सम्मान गरेको छ । नरैनापुर गाँउपालिकाले ५८ औँ राष्ट्रिय बाल दिवसको अवसर पारेर आज महेन्द्र माध्यमिक मटेहिया विद्यालयमा आयोजित कार्यक्रममा गाउँपालिका भित्रका कक्षा १० मा उत्कृष्ट नतिजा हासिल गर्ने विद्यार्थीलाई सम्मान गरेको हो ।

गाउँपालिकाले २६ विद्यार्थीलाई सम्मान गरेको हो । सम्मानित हुने विद्यार्थीहरु मध्ये दिक्षिणा यादव र पवन सिंह यादवलाई एसईईमा सर्र्बोत्कृष्ट अंक ल्याएर उत्तीर्ण भएकोमा ल्यापटप प्रदान गरिएको थियो भने अरु उत्कृष्ट विद्यार्थीहरुलाई नेपालको संविधान, कापी, झोला, प्रमाणपत्र र खादा लगाएको थियो ।

कार्यक्रममा गाउँपालिका अध्यक्ष इश्तियाक अहमद शाहले विकास भनेको बाटो निर्माण गर्नु मात्र नभएको बताउँदै शिक्षा र स्वास्थ्यमा सुधार गर्न सके सबै क्षेत्र क्रमिकरुपमा विकास हुँदै जाने बताए । अध्यक्ष शाहले कार्यक्रमलाई सम्बोधन गर्दै भने, 'सर्बोत्कृष्ट २ जनालाई आज जसरी ल्यापटप प्रदान गरिएको छ, यसैगरी तपाईंहरुहरु पनि मेहनत गर्नुहोस्, सर्बोत्कृष्ट हुने सबै विद्यार्थीहरुलाई ल्यापटप प्रदान गर्छौं ।' उनले गाउँपालिकाले शिक्षा क्षेत्रलाई उच्च प्राथमिकतामा राखेर कार्यक्रम अगाडि बढाएको बताए ।

गाउँपालिकाका शिक्षा अधिकृत कृष्णप्रसाद थारुले नरैनापुर भित्रको शिक्षाको गुणस्तर बढाउनका लागि विद्यार्थी, शिक्षक र विद्यालयलाई हौसला स्वरुप उक्त पुरस्कार तथा सम्मान प्रदान गरिएको जानकारी दिए । गाउँपालिकाका प्रमुख प्रशासकीय अधिकृत मणिराम खरालले उक्त सम्मानले भावी दिनमा शिक्षण सिकाई क्रियाकलापलाई थप अगाडि बढाउन उर्जा प्रदान गर्ने बताए ।

यसैगरी वडा नम्बर ५ का अध्यक्ष कृष्णचन्द्र मौर्यले शिक्षा क्षेत्रमा राजनीति नगर्न सबैलाई आग्रह गर्दै शिक्षा क्षेत्रको सुधारका लागि जनप्रतिनिधिहरु प्रतिबद्ध रहेको बताए । उनले नरैनापुर ५ लाई अबको ५ वर्षमा शिक्षाको हब बनाउने बताए ।

कार्यक्रममा गाउँपालिका अध्यक्षसँगै प्रमुख प्रशासकीय अधिकृत खराल, वडा नं. १ का अध्यक्ष इशाक जोलाह, वडा नं. २ का अध्यक्ष मसुद अहमद शाह, वडा नं. ५ का अध्यक्ष मौर्य, वडा नं. ४ का अध्यक्ष मनोज मिश्रा, जिन्सी शाखा प्रमुख भरत महतो, विपत शाखा प्रमुख लक्ष्मीकान्त मिश्रा, रोजगार शाखा प्रमुख मकबुल मुकेरी, कमल केसी लगायतले सम्मान प्राप्त गर्ने विद्यार्थीलाई पुरस्कार तथा सम्मान प्रदान गरेका थिए ।

नरैनापुर गाउँपालिकाको वडा नं. ६ मा रहेकोे नेपाल राष्ट्रिय माध्यमिक विद्यालय जमुनीले आजै ‘बालमैत्री समाजको आधार-जिम्मेवार परिवार, उत्तरदायी सरकार’ विषयमा वक्तृत्वकला कार्यक्रम समेत आयोजना गरेको थियो । वक्तृत्वकलामा उत्कृष्ट भएकाहरुलाई गाउँपालिका अध्यक्ष शाहले पुरस्कार वितरण गरेका थिए ।

प्रकाशित मिति: बुधबार, भदौ २९, २०७९ २१:३१

प्रतिक्रिया दिनुहोस्