जुम्लामा पहिरोमा पुरिएर एकै परिवारका ५ जनाको मृत्यु

समाचार

गृहपृष्ठ
समाचार
जुम्लामा पहिरोमा पुरिएर एकै परिवारका ५ जनाको मृत्यु

जुम्लामा पहिरोमा पुरिएर एकै परिवारका ५ जनाको मृत्यु

शनिबार, असोज २२, २०७९ बागेश्वरी पोस्ट

फाइल फोटो

नेपालगन्ज । पहिरोमा पुरिएर एकै घर परिवारका ५ जनाको मृत्यु भएको छ । पहिरोमा २ जना बेपत्ता छन् । जुम्लाको कनकासुन्दरी गाउँपालिका वडा नम्बर ५ को बाराकोटे बाडा भन्ने स्थानमा गएको पहिरोमा एकै घरका ५ जनाको मृत्यु बहेको जिल्ला प्रहरी कार्यालय जुम्लाले जनाएको छ ।

उक्त पहिरोमा पुरिएर गणेश बहादुर शाही, उनका छोरा रमेश, रमेशकी श्रीमती पानसरा तथा उनीहरुका छोराहरु अनमोल र मिलनको मृत्यु भएको प्रहरीले जानकारी दिएको छ ।

आज बिहान करिब ३–४ बजेतिर घरमाथि पहिरो खसेर उनीहरु पुरिएका थिए । उनीहरुका छिमेकी सुरेन्द्र हमाल र गणेश बहादुर शाही पहिरोमा बेपत्ता छन् । उनीहरुको खोजी भइरहेको जिल्ला प्रहरी जुम्लाले जनाएको छ। गृहमन्त्री बालकृष्ण खाँणले घाइतेको उद्धार र पुनस्थापनामा कुनै कसुर बाँकी नराख्न गृह प्रशासन र प्रमुख जिल्ला अधिकारीलाई निर्देशन दिएका छन् ।

पहिरो खसेको स्थलबाट दुई जनालाई घाइते अवस्थामा उद्धार गरिएको छ भने घाइतेहरुमध्ये रामबहादुर हमालको अवस्था सामान्य र सरस्वती हमालको अवस्था गम्भीर रहेको प्रहरीले जानकारी दिएको छ । उनीहरुको अहिले स्थानीय स्वास्थ्य चौकीमा उपचार भइरहेको छ । हेलिकोप्टर झिकाएर उनीहरुलाई उपचार गर्न सुविधासम्पन्न अस्पताल लैजाने तयारी भइरहेको प्रहरीले जनाएको छ । प्रहरीका अनुसार पहिरो गएर बाटाहरु सबै बन्द भएकाले हेलिकोप्टर झिकाउन लागिएको प्रहरीले बताएको छ ।

प्रकाशित मिति: शनिबार, असोज २२, २०७९ ११:५४

प्रतिक्रिया दिनुहोस्