कोहलपुर बसपार्कका व्यवसायीले स्वतःस्फूर्तरुपमा सटर खाली गरे

स्थानीय

गृहपृष्ठ
स्थानीय
कोहलपुर बसपार्कका व्यवसायीले स्वतःस्फूर्तरुपमा सटर खाली गरे

कोहलपुर बसपार्कका व्यवसायीले स्वतःस्फूर्तरुपमा सटर खाली गरे

मंगलबार, कात्तिक १, २०७९ बागेश्वरी पोस्ट

कोहलपुर । अन्ततः कोहलपुर नगरपालिकास्थित बसपार्कका व्यवसायीहरुले सटरहरु खाली गरेका छन् । कोहलपुर नगरपालिकाले नगर विकास समिति अन्तर्गत रहेका सटरहरु हटाउन ब्यवसायीलाई पटक–पटक समय दिएको थियो ।

पछिल्लो पटक बसेको सर्वदलीय तथा सर्वपक्षीय बैठकले असोज मसान्तसम्म सटरहरु खाली गर्न लिखित सहमति गरेको थियो । सोही सहमति अनुसार व्यवसायीले स्वतःस्र्फुतरुपमा सटर खाली गरेको कोहलपुर नगर प्रहरी प्रमुख वीरबहादुर थापाले बताए । ‘सहमति अनुसार अधिकांशले सटर खाली गरिसक्नुभएको थियो,' उनले भने–‘बाँकी केहीले अटेरी गर्नुभएको थियो, उहाँहरुले पनि आज खाली गराउनुभएको छ ।’

नगर विकास समितिको जग्गामा निर्माण भएका सटरहरु खाली गराउन लामो समयदेखि नगरपालिकालाई संघर्ष गर्नुपरेको थियो । तर, कोहलपुर नगरपालिकाका प्रमुख पूर्णप्रसाद आचार्यले सबै राजनीतिक दलहरुलाई सहमतिमा ल्याएर सटर खाली गराउन सफल भएका हुन् । ३०औंं वर्षदेखि नगर विकास समितिको जग्गामा व्यवसायीहरुले कब्जानै जमाएका थिए । बसपार्क सुधार समितिले उनीहरुबाट भाडा असुल्ने गरेको थियो । त्यसका लागि समितिले नगर विकाससँग सम्झौता गरेको थियो ।

आर्थिक वर्ष ०७८–०७९ का लागि समितिले नगर विकाससँग वार्षिक ३ लाख ८ हजार रुपैयाँमा सम्झौता गरेको थियो । त्यहाँ ७५ वटा सटर छन् । तर, आर्थिक वर्ष ०७९–०८० का लागि भने नगर विकास समितिले सुधार समितिलाई सटर भाडामा दिन नवीकरण गरेको थिएन । ‘सहमति अनुसार व्यवसायीले सटर खाली गर्नुभएको छ, कोहलपुर नगरपालिकाका नगर प्रमुख आचार्यले भने–‘उहाँहरुप्रति धन्यवाद छ ।’ सबै राजनीतिक दलहरुलाई सहमतिमा ल्याएर सटरहरु खाली गराउन सफल भएको पनि उनको भनाई छ । ‘लामो समयदेखि बसिरहेकालाई सटर छाड्नु पर्दा केहीलाई अप्ठ्यारो लाग्नु स्वभाविकै हो,' उनले भने–‘हाम्रो आग्रहलाई सबैले स्वीकार गर्नुभयो ।’

कोहलपुर नगरपालिकालाई व्यवस्थित र विकसित सहरकारुपमा विकास गर्ने कोहलपुर नगरपालिकाको मुख्य उद्देश्य रहेको पनि उनले बताए । कोहलपुर नगरपालिकाले फुटपाथलाई व्यवस्थित बनाउने कार्यलाई तीब्रताका साथ अघि बढाएको छ ।

प्रकाशित मिति: मंगलबार, कात्तिक १, २०७९ २१:४०

प्रतिक्रिया दिनुहोस्