नेपालगञ्जमा खोज तथा उद्दारकर्ता तयार पारिँदै

स्थानीय

गृहपृष्ठ
स्थानीय
नेपालगञ्जमा खोज तथा उद्दारकर्ता तयार पारिँदै

नेपालगञ्जमा खोज तथा उद्दारकर्ता तयार पारिँदै

शनिबार, जेठ ६, २०८० बागेश्वरी पोस्ट

नेपालगञ्ज । नेपालगञ्जमा खोज तथा उद्दारकर्ता तयार पारिँदैछ । विपदको समयमा हुने मानवीय क्षती न्यूनीकरण गर्न खोज तथा उद्दारकर्ता तयार पार्न थालिएको हो । त्यसका लागि चरणबद्ध तालिमहरु आयोजना हुँदै आएका छन् । भूकम्प, आगलागी लगायत विपदको उच्च जोखिममा रहेका नेपालगञ्ज उपमहानगरपालिकाका वडा नम्बर ३ र ७ का स्थानीयलाई तालिम दिइएको छ ।

शहरी विपद तथा भूकम्पीय पूर्व तयारी परियोजना (सुपर प्रोजेक्ट) अन्तर्गत नेपालगञ्ज उपमहानगरपालिकाको आयोजनामा खोज तथा उद्दार तालिम दिइएको हो । समुदायस्तरमा करिब ४०० जना जनशक्ति उत्पादन गर्ने गरी थालिएको तालिममा खोज तथा उद्दार, अग्नी नियन्त्रण तथा प्राथमिक उपचार सम्वन्धि तालिम दिइनेछ । विपदको समयमा घटना घटे लगत्तै सुरक्षित उद्दार कार्यका लागि तालिम प्रदान गरिएको आपतकालीन कार्य सञ्चालन केन्द्रका सूचना व्यवस्थापन अधिकृत रुपन ज्ञवालीले बताए । पछिल्लोपटक प्राथमिक उपचार र घरेलु आगलागी नियन्त्रण सम्बन्धि दुई दिने तालिम प्रदान गरिएको छ ।

नेपालगञ्जमा हुने विपद, नीतिगत व्यवस्था तथा प्रयास, सामुदायिक खोज तथा उद्दार, सुरक्षा सामग्रीहरुको प्रयोग, यसको प्रयोगात्मक प्रदर्शन, विपद अवस्थाको विश्लेषण र विपद प्रतिकार्यमा घाइतेको ओसारपसार, घरेलु उपाय र यिनीहरुको प्रदर्शनी लगायतका विषयमा प्रशिक्षण दिइएको छ । आपतकालीन कार्य सञ्चालन केन्द्रका सूचना व्यवस्थापन अधिकृत ज्ञवाली, रेडक्रमकर्मीद्वय प्रहलाद विश्वकर्मा र सुशिल चौधरी तथा सशस्त्र प्रहरीका महेश बुढाले प्रशिक्षण दिएका थिए । सुपर प्रोजेक्ट युरोपियन युनियनको आर्थिक सहयोग तथा युएनडिपी, युनिसेफ र युएन ओमनको साझेदारीमा नेपाल रेडक्रस सोसाइटी बाँके शाखाद्वारा सञ्चालित छ । नेपालगञ्जको वडा नम्बर ३ र ७ मा सुपर प्रोजेक्ट सञ्चालन भइरहेको छ ।

प्रकाशित मिति: शनिबार, जेठ ६, २०८०, २०:४७:००

प्रतिक्रिया दिनुहोस्