नेपालगञ्जको व्यवसाय निरन्तरता योजना कार्यान्वयन, निजी क्षेत्रसंग छलफल

स्थानीय

गृहपृष्ठ
स्थानीय
नेपालगञ्जको व्यवसाय निरन्तरता योजना कार्यान्वयन, निजी क्षेत्रसंग छलफल

नेपालगञ्जको व्यवसाय निरन्तरता योजना कार्यान्वयन, निजी क्षेत्रसंग छलफल

बिहीबार, जेठ १८, २०८० बागेश्वरी पोस्ट

नेपालगञ्ज । नेपालगञ्ज उपमहानगरपालिकाले तयार पारेको व्यवसाय निरन्तरता योजना कार्यान्वयनमा ल्याएको छ ।

विपतको समयमा पनि सुचारु गर्नुपर्ने सेवाहरुको निरन्तरताका लागि नेपालगञ्ज उपमहानगरपालिकाको योजना बनाइएको हो । योजना बनाउन सरोकारवालासंग निरन्तर कार्यशाला आयोजना गरेर घनीभूत छलफल गरिएको थियो ।

युरोपियन युनियनको आर्थिक सहयोग तथा युएनडिपी, युनिसेफ र युएन ओमनको साझेदारीमा नेपाल रेडक्रस सोसाइटी बाँके शाखाद्वारा नेपालगञ्ज उपमहानगरपालिकामा संचालित शहरी विपद् तथा भूकम्पीय पूर्व तयारी परियोजना (सुपर प्राजेक्ट) अन्तर्गत बनाइएको योजना नेपालगन्ज उपमहानगरपालिकालाई हस्तान्तरण गरी कार्यान्वयनमा आएको हो । सुपर परियोजना नेपालगञ्ज उपमहानगरपालिकाको वडा नम्बर ३ र ७ मा सञ्चालित छ ।

विपतको समय र अन्य अवरोधहरुमा प्रशासनलाई उत्थानशील बनाई निरन्तरताका लागि रणनैतिक गतिविधि कार्यान्वयन सहितको योजना तयार गरिएको आपतकालीन कार्य सञ्चालन केन्द्रका सूचना व्यवस्थापन अधिकृत रुपन ज्ञवालीले बताए ।

यसैक्रममा आज व्यवसाय निरन्तरता योजना कार्यान्वयनमा निजी क्षेत्रको भूमिका र सहकार्यका साथै उक्त योजना प्रभावकारी बनाउन छलफल गरिएको छ । छलफल कार्यक्रममा नेपालगन्ज उपमहानगरपालिकाका प्रमुख प्रशासकीय अधिकृत शिवप्रसाद रिजालले व्यवसाय निरन्तरता योजनाबारे जानकारी गराएका थिए । विपत शाखा प्रमुख वातावरण इन्जिनियर प्रकाश डिसीले विपत व्यवस्थापनमा भइरहेका गतिविधिहरुबारे प्रस्तुतिकरण गरेका थिए ।

यो योजना बनाउनुको उद्देश्य जोखिम न्यूनीकरणका क्रियाकलाप अबलम्बन गरी पालिकाका कर्मचारीहरुको सुरक्षा र विपतबाट हुने कार्यालय सञ्चालनका लागि आवश्यक स्रोत साधनको हानी नोक्सानी न्यूनीकरण गर्नु रहेको प्रमुख प्रशासकीय अधिकृत रिजालले बताए ।

यस्तै यसबाट सुव्यवस्थित ढंगले महत्पूर्ण प्रक्रियाहरु र सेवाहरुको निरन्तरता सुनिश्चित राख्नका लागि उपयुक्त कार्यहरु छनौट गरी मार्गदर्शन गर्नु, समयमै प्रतिकार्य, पुनर्लाभ तथा पुनर्निमाणका कार्यहरु गर्ने र सेवा प्रवाहलाई निरन्तरता दिने लगायतका कार्यमा सहजता पुग्ने बताइएको छ ।

त्यसक्रममा बोल्दै नगर उपप्रमुख कमरुद्दिन राईले व्यवसाय निरन्तरता योजनाले विपतको समयमा पनि सेवा सुचारु गर्न सहजता हुने विश्वास व्यक्त गरे । राईले नेपालगञ्ज विपतको जोखिममा रहेकाले यसखाले योजनाले पूर्व अभ्याससंगै प्रतिकार्य गर्न सहयोग पुग्ने उल्लेख गरे ।

योजना कार्यान्वयनका लागि नेपालगञ्ज उपमहानगरपालिका प्रतिबद्ध रहेको उनको भनाई छ । युनिसेफकी निलिमा रावतले निजी क्षेत्रको भूमिका महत्वपूर्ण हुने बताइन् ।

वातावरण तथा विपत समिति संयोजक समिरप्रताप सिंहको अध्यक्षतामा भएको कार्यक्रममा नेपाल रेडक्रस सोसाइटी बाँके शाखाका सभापति गोबद्र्धनसिंह सम्झना, नेपालगन्ज उपमहानगरपालिकाका विभिन्न शाखाका प्रमुख र निजी क्षेत्र (होटेल व्यवसायी, निर्माण व्यवसायी, बैंकर्स, नेपालगन्ज उद्योग व्यवसायी संघ, घरेलु महासंघ, अस्पताल प्रतिनिधि, गैरसरकारी संस्था महासंघ लगायत) का सरोकारवालाको उपस्थिति रहेको थियो ।

प्रकाशित मिति: बिहीबार, जेठ १८, २०८०, १५:१९:००

प्रतिक्रिया दिनुहोस्