खोप लिन छुटेका नेपालगञ्ज-६ का बालबालिकालाई ६ गते खोप लगाइने

स्वास्थ्य

गृहपृष्ठ
स्वास्थ्य
खोप लिन छुटेका नेपालगञ्ज-६ का बालबालिकालाई ६ गते खोप लगाइने

खोप लिन छुटेका नेपालगञ्ज-६ का बालबालिकालाई ६ गते खोप लगाइने

सोमबार, वैशाख ४, २०८० बागेश्वरी पोस्ट

नेपालगञ्ज । नेपालगञ्ज उपमहानगरपालिका ६ का खोप लिन छुटेका बालबालिकालाई यही ६ गते खोप लगाइने भएको छ । घरधुरी सर्वेक्षणका क्रममा उमेर पुगेका ३२ जना बालबालिकाले लिनुपर्ने नियमित खोप नलिएको पाइएपछि उनीहरुलाई खोप लगाइने भएको शहरी स्वास्थ्य केन्द्रका प्रमुख नवराज आचार्यले जानकारी दिए । खोप लिन छुटेका १६ देखि ५९ महिनाका बालबालिका छन् ।

शहरी स्वास्थ्य केन्द्रको आयोजना, नेपालगञ्ज उपमहानगरपालिकाको समन्वय र वडा कार्यालयको सहयोगमा आज आयोजित पूर्ण खोप दिगोपनाको लागि सरोकारवालाहरुसँगको एक दिने अन्तरक्रिया कार्यक्रममा खोपको आवश्यकता, महत्वका बारेमा समेत जानकारी गराइएको थियो ।

खोप लिन छुटेका बालबालिकाका अभिभावक, खोप समन्वय समितिका पदाधिकारी, जनप्रतिनिधि, विद्यालयका प्रधानाध्यापक, स्वास्थ्य स्वयंसेविका, आमा समूह, किशोरी समूह, बाल क्लवका प्रतिनिधिहरु सम्मेलित अन्तरक्रियामा नेपालगञ्ज उपमहानगरपालिका स्वास्थ्य महाशाखाका निमित्त प्रमुख जागेश्वर बस्नेतले पूर्ण खोप दिगोपनाका लागि खोप लगाउन जरुरी रहेको बताए । उनले उमेर पुगेका कुनै पनि बालबालिका नियमित खोपबाट बञ्चित हुनु नपरोस् भनेर उपमहानगरपालिकाले खोज र खोप अभियान नै चलाएको पनि उल्लेख गरे । त्यसको आधारमा छुटेका बालबालिकालाई खोप लगाउन लागिएको उनको भनाई छ ।

अन्तरक्रिया कार्यक्रममा बोल्दै वडा अध्यक्ष समिरप्रताप सिंहले नियमित खोप लगाउन बालबालिकाका अभिभावकहरुलाई आग्रह गरे । खोप नलगाएकै कारण पछिल्लो पटक नेपालगञ्जमा दादुरा महामारी फैलिएको भन्दै यस्ता महामारी रोक्न र बालबालिकालाई सुरक्षित राख्न खोप जरुरी रहेको उनको भनाई छ ।

No description available.