लुम्बिनी प्रदेशका जिल्ला मध्ये बाँकेमा मातृ मृत्युदर सबैभन्दा बढी

स्वास्थ्य

गृहपृष्ठ
स्वास्थ्य
लुम्बिनी प्रदेशका जिल्ला मध्ये बाँकेमा मातृ मृत्युदर सबैभन्दा बढी

लुम्बिनी प्रदेशका जिल्ला मध्ये बाँकेमा मातृ मृत्युदर सबैभन्दा बढी

मंगलबार, जेठ ३१, २०७९ बागेश्वरी पोस्ट

नेपालगन्ज । बाँकेमा मातृ मृत्युदर कहालीलाग्दो देखिएको छ । चालू आर्थिक वर्षको हालसम्म लुम्बिनी प्रदेशका १२ जिल्ला मध्ये बाँकेमा सबैभन्दा धेरै आमाको मृत्यु भएको छ । त्यसमा पनि सुत्केरीपछि मृत्यु हुनेको संख्या ७२ प्रतिशत रहेको छ । सबैभन्दा धेरै मृत्यु हुनेमा १९ देखि ३५ वर्ष उमेर समूहका आमा छन् ।

चालू आर्थिक वर्षको हालसम्म बाँकेमा १७ जना आमाले ज्यान गुमाइसकेका छन् । सबैभन्दा धेरै ज्यान गुमाउनेमा नेपालगन्ज उपमहानगरपालिकाका ८ जना छन् । भेरी अस्पताल, मेडिकल कलेज लगायतका थुप्रै सुविधा सम्पन्न अस्पतालहरु भएको नेपालगन्ज उपमहानगरपालिकामै आमाहरु असुरक्षित हुनुले यहाँको स्वास्थ्य अवस्थालाई समेत उदांगो बनाइदिएको छ । कोहलपुर नगरपालिका, राप्तीसोनारी गाउँपालिका, जानकी गाउँपालिका र नरैनापुर गाउँपालिकामा मातृ मृत्युदर बढी देखिएको छ ।

स्वास्थ्य कार्यालय बाँकेका पब्लिक हेल्थ नर्स विष्णु श्रेष्ठका अनुसार चालू आर्थिक वर्षको ६ महिनामा १४ जनाले ज्यान गुमाइसकेका छन् ।त्यसपछि थप चार जना आमाको पनि ज्यान गएको छ । तर, उनीहरुको तथ्याङ्क समावेश गरिएको छैन । अघिल्लो आर्थिक वर्षमा ६ जना आमा गुमाएको डुडुवा पालिकाले चालू आर्थिक वर्षको हालसम्म भने एक जना आमा गुमाएको छैन । खजुरा र बैजनाथ गाउँपालिकामा पनि आमा मृत्युदर शून्य देखिएको छ ।

स्वास्थ्य कार्यालय बाँकेको आयोजनामा नेपालगन्जमा आयोजना गरेको परिवार नियोजन सुरक्षित मातृत्व तथा नवजात शिशु सम्बन्धि कार्यक्रममा श्रेष्ठले सुत्केरीपछि हुने मृत्यु ७२ प्रतिशत रहेको बताइन् । त्यस्तै गर्भवतिमै मृत्यु हुने २८ प्रतिशत रहेको छ । यो हिसावले हेर्दा बच्चा जन्मिनु भन्दा बच्चा जन्मिसकेपछि धेरै आमाको मृत्यु भएको देखिएको छ ।

स्वास्थ्य कार्यालय बाँकेका प्रमुख धीरजंग शाहले गर्भावस्थामा नियमित स्वास्थ्य चेकजाँच नगर्नु, परिवारले उचित स्याहारमा ध्यान नदिनु लगायतका कारणले पनि आमा मृत्यु बढेको बताए । यस्तै भेरी अस्पतालका वरिष्ठ स्त्रीरोग विशेषज्ञ डा. कल्पना थापाले मातृ मृत्यु घटाउन सबैको भूमिका महत्वपूर्ण रहेको बताइन् । उनले गर्भावस्थामा नियमित स्वास्थ्य चेकजाँच गर्नुपर्ने, अस्पतालमै सुत्केरी हुनुपर्ने लगायतका सवालमा परिवार पनि संवेदनशील बन्नुपर्ने बताइन् ।

प्रकाशित मिति: मंगलबार, जेठ ३१, २०७९, १५:०३:००

प्रतिक्रिया दिनुहोस्