उद्योगमन्त्री रिजाल र बेलायती राजदुत फेनबीच भेटवार्ता

राजनीति

गृहपृष्ठ
राजनीति
उद्योगमन्त्री रिजाल र बेलायती राजदुत फेनबीच भेटवार्ता

उद्योगमन्त्री रिजाल र बेलायती राजदुत फेनबीच भेटवार्ता

बिहीबार, भदौ २१, २०८० बागेश्वरी पोस्ट

काठमाडौं । उद्योग, वाणिज्य तथा आपूर्ति मन्त्री रमेश रिजालसँग नेपालका लागि बेलायतका राजदूत रोब फेनले शिष्टाचार भेटवार्ता गरेका छन् । आज मन्त्रालयमा भएको भेटवार्तामा द्विपक्षीय हित र चासोका विषयमा छलफल भएको थियो ।

भेटमा मन्त्री रिजालले नेपाल र बेलायतबीच पूरानो कुटनीतिक एवम् मैत्री सम्बन्ध रहेको र त्यसलाई थप विस्तार गर्ने बताए । राजदूत फेनको कार्यकालमा दुई मुलुकबीचको सम्बन्धका आयामहरु थप विस्तार हुँदै जानेमा आफू विश्वस्त रहेको समेत मन्त्री रिजालले स्पष्ट पारे।

नेपाल–बेलायतमैत्री सन्धि सम्पन्न भएको एक सय वर्ष पुगेको सन्दर्भमा सन् २०२३ दुई मुलुकबीचको सम्बन्धको लागि विशेष वर्षको रुपमा रहेको बताउँदै मन्त्री रिजालले बेलायतले नेपालको प्रमुख विकास साझेदारको रुपमा रहँदै मानव विकास, आर्थिक विकास, सुशासन एवम् मानवीय सहायताको आयाममा निरन्तर सहयोग प्रदान गर्दै आएकोमा कृतज्ञता व्यक्त गरे ।

बेलायतले नेपाल जस्ता अति कम विकसित मुलुकमा उत्पादित वस्तुलाई सहुलियतपूर्ण बजार पहुँच प्रदान गर्न लागू गर्दै आएको GSP कार्यक्रमबाट नेपालको निर्यात प्रवर्द्धनमा सहयोग पुग्दै आएको बताउँदै मन्त्री रिजालले बेलायत सरकारले हालै शुरुवात गरेको Developing Countries Trading Scheme (DCTS) बाट समेत नेपालको निर्यात थप विस्तार हुँदै जाने अपेक्षा ब्यक्त गरेका छन् ।

त्यसैगरी DCTS अन्तर्गतको अति कम विकसित मुलुकलाई प्रदान गरिएको सुविधाको थप केही वर्षसम्म निरन्तरता दिन मन्त्री रिजालले वेलायत सरकारसग अनुरोध गरेका छन् । बेलायती लगानीकर्ताहरू नेपालमा मुख्यतया ऊर्जा, सूचना प्रविधि र सेवा क्षेत्रमा लगानी गर्न उत्सुक रहेको बताउँदै मन्त्री रिजालले नेपालमा बेलायती लगानी विस्तारको लागि राजदुत फेनको ठोस प्रयास रहनेमा आफू विश्वस्त रहेको बताएका छन् ।

भेटका क्रममा राजदुत फेनले दुई देशबीचको सम्बन्ध बिस्तार र मजबुत बनाउने र थप सहयोग र सहकार्यमा आफ्नो जोड रहने बताएका थिए ।

प्रकाशित मिति: बिहीबार, भदौ २१, २०८० १४:५७