सञ्चारकर्मी ढकाल हत्यामा संलग्न दुईजनालाई ३९ बर्ष जेल सजाय

समाचार

गृहपृष्ठ
समाचार
सञ्चारकर्मी ढकाल हत्यामा संलग्न दुईजनालाई ३९ बर्ष जेल सजाय

सञ्चारकर्मी ढकाल हत्यामा संलग्न दुईजनालाई ३९ बर्ष जेल सजाय

बिहीबार, माघ २, २०७६ बागेश्वरी पोस्ट

मकवानपुर । सञ्चारकर्मी मनोहर ढकालको हत्यामा संलग्न भएका दुई जनालाई जिल्ला अदालत मकवानपुरले ३९ बर्ष कैद र ७० हजार रुपैयाँ जरिवाना फैसला गरेको छ ।

जिल्ला न्यायाधीश दिल्लीरत्न श्रेष्ठको इजलासले हेटौंडा ११ का २० वर्षीय अनमोल पुडासैनी र हेटौडा १२ का १९ वर्षीय प्रविण वाइवालाई दोषी ठहर गरी जनही ७० हजार रुपैयाँ जरिवाना पनि गरेको छ ।

हेटौंडा ११ नवलपुरका ३८ वर्षीय पत्रकार ढकालको पुडासैनी र वाइवाले २०७५ पुस २५ गते हेटौंडा १ भैरवडाँडास्थित राप्ति जंगलमा हत्या गरेका थिए । हत्या गरेर ढकालसँग भएको सुनको औंठी, मोबाइललगायत सामान लुटेका थिए । हत्या गरिएका रेडियोकर्मी ढकाल रेडियो पालुङमा कार्यरत थिए ।

ढकालको लुटिएको सुनको औंठी खरिद गर्ने नारायणबहादुर सुनुवारलाई २५ हजार रुपैयाँ जरिवाना गर्ने फैसला गरेको छ । पुडासैनी र वाइवाले ढकाललाई मोटरसाइकलबाट लडाएर कन्चटमा ढुंगाले हिर्काएर हत्या गरेकोे प्रहरीसँगको बयानमा बताएका थिए । ढकालको हत्या गरेकोमा जन्मकैद अर्थात २५ वर्ष र डकैती गरेकोमा १४ वर्ष गरी ३९ वर्ष कैद गर्ने फैसला भएको स्रेस्तेदार केशवराज कौशिकले जानकारी दिए ।

प्रकाशित मिति: बिहीबार, माघ २, २०७६ २२:४२

प्रतिक्रिया दिनुहोस्