दाङ स्कुटर चोर प्रकरण: छानबिन गर्न आईजिपिको निर्देशन

सुरक्षा-अपराध

गृहपृष्ठ
सुरक्षा-अपराध
दाङ स्कुटर चोर प्रकरण: छानबिन गर्न आईजिपिको निर्देशन

दाङ स्कुटर चोर प्रकरण: छानबिन गर्न आईजिपिको निर्देशन

सोमबार, फागुन १, २०७९ बागेश्वरी पोस्ट

नेपालगन्ज । दाङ प्रहरीले स्कुटर चोरलाई बचाएको आरोप लागेपछि प्रहरी प्रधान कार्यालय काठमाडौंको निर्देशनमा लुम्बिनी प्रदेश प्रहरी कार्यालयले घटना बारे छानबिन गर्न समिति बनाएको छ ।

लुम्बिनी प्रदेश प्रहरी प्रमुख डिआईजी टेकप्रसाद राइले घटनाबारे ध्यानाकर्षण भइसकेको भन्दै घटनाबारे यथार्थ छानबिन गर्न आफुले निर्देशन दिइसकेको बताए ।

घोराहीको मुख्य चोक बिपीचोक नजिकै रहेको टिभिएस शोरुमबाट दिउँसै स्कुटर चोरिएपछि प्रहरीले चोरीमा संलग्न अभियुक्तलाई मुद्दा नचलाई छाडेको समाचार सार्बजनिक भएको थियो ।

नेपाल प्रहरी महानिरीक्षक आईजिपी धिरजप्रताप सिंहले स्कुटर चोरी प्रकरणमा चोरलाई जोगाउन प्रहरीको मिलेमतो भए नभएको बारे छानबिन गरेर कारबाही गर्न प्रदेश प्रहरी प्रमुखलाई निर्देशन दिएका हुन् । आईजिपी सिंहको निर्देशनपछि प्रदेश प्रहरी प्रमुख राईले प्रदेश प्रहरीमा कार्यरत एसपी नबरत्न पौडेलको नेतृत्वमा छानबिन समिति गठन गरिएको जानकारी दिए ।

उनले पौडेल नेतृत्वको छानबिन समितिलाई एक हप्ताभित्र प्रतीबेदन पेश गर्ने र यदि चोरी घटनामा प्रहरीको मिलेमतोमा भेटिए माथिल्लोदेखि तल्लो दर्जाका जुन कुनै प्रहरीलाई कारबाही गर्ने चेतावानी दिए ।

यो घटनाले प्रहरी संगठनमाथि प्रश्न चिन्ह खडा भएकाले प्रहरीकै मिलेमतोमा चोरी घटनाको अभियुक्त मुद्दा नचलाई छुटेको भए घटनामा संलग्न जो कोही पनि कारबाहीको दायरामा आउने उनले बताए ।

गएको शुक्रवार दिउँसोको १ बजेर ३० मिनेट जाँदा नोवेल ट्रेडिङ प्रालिको घोराही–१५ बिपीचोकको टिभिएस शोरुमबाट नचिनेका व्यक्तिले टिभिएस स्कुटर लगेपछि शोरुम सन्चालकले शोरुमबाट स्कुटर चोरी भएको भन्दै सामाजिक सन्जालमा आक्रोशसहित लेखेका थिए ।

शोरुम सञ्चालक चित्रबहादुर विष्टका अनुसार शुक्रबार दिउँसो दुई लाख ९५ हजार नौ सय मूल्यको एनटर्क स्कुटर चोरी भएको भन्दै सामाजिक सन्जालमा लेखेर प्रहरीमा उजुरी नै दिएका थिए ।

चोरीमा सम्लग्नलाई प्रहरीले पक्राउ नगरेको भन्दै सञ्चालक विष्टले असन्तुष्टि जनाउँदै गुनासो गरे। बिष्टले सिसी क्यामरा फुटेजसहित निवेदन सोही दिन जिल्ला प्रहरी कार्यालय दाङमा बुझाए ।

त्यसपछि प्रहरी अनुसन्धानमा जुट्यो । प्रहरीले घोराहीको कटुवा खोलाबाट स्कुटी फेला पा¥यो । त्यसको केही दिनपछि प्रहरीले सिसीटिभी फुटेजको सहारामा स्कुटी चोरीमा संलग्न व्यक्तिलाई पक्राउ गर्यो ।

माघ २४ गते घोराही ३ का कुमार रानालाई स्कुटर चोरीमा संलग्न भएको आरोपमा पक्राउ पनि गरेर ल्यायो । तर, स्कुटी चोरीमा संलग्न ब्यक्तिलाई मुद्दा नचलाई छाडेको प्रहरीलाई आरोप लागेको छ ।

रानालाई छुटाउन गणेश नेपालीले जिप्रका पुगेर दबाब दिएको प्रहरी स्रोतको दावी छ । जिल्ला प्रहरी कार्यालय दाङका डीएसपी राजन गौतमले पीडित पक्षले नै चोरी गर्ने मान्छे चिनजानको मान्छे भएकाले मुद्दा नचलाउन आग्रह गरेकाले छाडिएको बताए ।

प्रहरीको यो कार्य शंकास्पद रहेको भन्दै यस्तै चोरीका घटना भएमा यस्तै नजिर दोहोरिए के गर्ने भन्ने आम सरोकारवालाले प्रश्न गरेका छन् । कुनै पनि घटनामा प्रहरीले लिखित जाहेरी नआए प्रहरी प्रतिबेदनका आधारमा मुद्दा चलाउने गर्छ, तर, प्रहरीले यो घटनामा मुद्दा नचलाई छोड्दा चौतर्फी चासो प्रकट भएको छ । फरककोण

प्रकाशित मिति: सोमबार, फागुन १, २०७९ १४:११