बाँके प्रहरीद्वारा नक्कली नेपाली नोट र लागूऔषध कारोबारी सार्वजनिक

सुरक्षा-अपराध

गृहपृष्ठ
सुरक्षा-अपराध
बाँके प्रहरीद्वारा नक्कली नेपाली नोट र लागूऔषध कारोबारी सार्वजनिक

बाँके प्रहरीद्वारा नक्कली नेपाली नोट र लागूऔषध कारोबारी सार्वजनिक

बिहीबार, फागुन ४, २०७९ बागेश्वरी पोस्ट

रबिन्द्र घिमिरे-नेपालगञ्ज । नेपालगञ्जबाट ५ लाख ६९ हजार नेपाली नक्कली नोटसहित पक्राउ परेका तीन जनालाई बाँके प्रहरीले आज सार्वजनिक गरेको छ ।

प्रहरीले जिल्ला प्रहरी कार्यालयमा आज पत्रकार सम्मेलन गरेर उनीहरुलाई सार्वजनिक गरिएको हो । लुम्विनी प्रदेश प्रहरी कार्यालय दाङ र जिल्ला प्रहरी कार्यालय बाँकेबाट खटिएको प्रहरी टोलीले नेपालगञ्ज उपमहानगरपालिका–४ स्थित न्यूरोडबाट फागुन २ गते साँझ साढे ५ बजेतिर उनीहरूलाई पक्राउ गरेको थियो ।

बाँकेका प्रहरी नायब उपरीक्षक प्रवक्ता रामप्रसाद घर्तीका अनुसार पक्राउ पर्नेमा कोहलपुर नगरपालिका–११ का ३२ वर्षीय मोहन कुमाई, अछामको तुर्माखाँद गाउँपालिका–३ का ३७ वर्षीय दीपक बिसी र सल्यानको वनगाँड कुपिण्डे नगरपालिका–५ का ३० वर्षीय मोहन राना छन् । उनीहरूको साथबाट प्रहरीले एक हजारका नक्कली नोट ५ सय ६९ हजार बरामद गरेको छ । नेपाली नक्कली नोटसहित पक्राउ परेकाहरुलाई मुलुकी अपराध संहिता २०७४ को दफा २५७ अनुसार ७ वर्षसम्म कैद र ७० हजारसम्म जरिवाना हुने व्यवस्था छ ।

त्यसैगरी लागूऔषध नियन्त्रण इकाई नेपालगञ्ज र जिल्ला प्रहरी कार्यालय बाँकेबाट खटिएको प्रहरी टोलीले नेपालगञ्ज उपमहानगर–१ स्थित वाटरपार्कबाट माघ २६ गते ५० ग्राम व्राउन सुगरसहित पक्राउ गरेका तीन जनालाई पनि सार्वजनिक गरिएको छ । पक्राउ पर्नेमा रुकुम पश्चिम सानोभेरीका २८ बर्षीय तिलक डाँगी, ३३ बर्षीय सोविराम केसी र ३५ बर्षीय विनोदकुमार गौतम छन् । लागूऔषध नियन्त्रण ऐन २०३३ अनुसार परिमाणको आधारमा सजायको व्यवस्था भएको समेत प्रहरी नायब उपरीक्षक प्रवक्ता रामप्रसाद घर्तीले बताएका छन् । साथै १० वर्षदेखि १५ वर्षसम्म कैद र ७५ हजारदेखि २ लाखसम्म जरिवाना हुनसक्ने कानुनी व्यवस्था रहेको समेत प्रवक्ता घर्तीले बताए ।

प्रकाशित मिति: बिहीबार, फागुन ४, २०७९ १६:२९

प्रतिक्रिया दिनुहोस्