मिटरब्याज पीडितसँग प्रधानमन्त्री प्रचण्डले भेट गर्दै

अर्थ

गृहपृष्ठ
अर्थ
मिटरब्याज पीडितसँग प्रधानमन्त्री प्रचण्डले भेट गर्दै

मिटरब्याज पीडितसँग प्रधानमन्त्री प्रचण्डले भेट गर्दै

मंगलबार, चैत १४, २०७९ बागेश्वरी पोस्ट

नेपालगन्ज । सरकारले काठमाडौंमा आन्दोलनरत मिटरब्याज पीडितहरूसँग छलफल गर्नका लागि वार्ता टोली गठन गरेको छ । समितिले पीडितहरूसँग वार्ता गरेपछि आवश्यक निर्णयका लागि मन्त्रिपरिषद्को बैठकमा छलफल हुनेछ ।

सरकारले पीडितहरुका समस्या समाधानका लागि कानुनी जटिलता फुकाउन संसदमा विधेयक दर्ता गर्ने तयारी समेत गरेको छ । उक्त विधेयकबारे आज बस्ने मन्त्रिपरिषद्को बैठकले सदनमा प्रस्तुत गर्नेबारे निर्णय गर्नेछ ।

बैठक अघि पीडितहरूसँग छलफल गर्न गृह मन्त्रालयका सहसचिव रुद्रदेवी शर्माको संयोजकत्वमा वार्ता टोली गठन गरिएको छ । वार्ता टोलीका अन्य सदस्यमा उपसचिव दिलकुमार तामाङ, प्रधानमन्त्री कार्यालयका उपसचिव उमाकान्त अधिकारी र कानुन मन्त्रालयका उपसचिव जंगाबहादुर दंगाल रहेका छन् ।

वार्ता टोलीले मिटरब्याज पीडितहरूसँग प्रत्यक्ष भेटेर छलफल गर्ने र सो बारेमा प्रधानमन्त्रीलाई जानकारी गराउने कार्यादेश दिइएको छ ।

पीडितहरू काठमाडौं आए लगत्तै प्रधानमन्त्री प्रचण्डले गृहसचिव र सचिवालयका पदाधिकारीलाई पीडितरूसँग छलफल गर्न र समस्या हल गर्ने वातावरण बनाउन निर्देशन दिएका थिए ।

पीडितहरूसँग वार्ता टोलीले छलफल गरेपछि प्रधानमन्त्री प्रचण्डले आज नै पीडितहरूसँग भेट गर्ने र थप छलफल गर्ने कार्यक्रम समेत रहेको छ ।

प्रकाशित मिति: मंगलबार, चैत १४, २०७९ १५:०९