पक्राउ परेका टोपबहादुर रायमाझीका छोरा सन्दीपलाई काठमाडौं लगिँदै

सुरक्षा-अपराध

गृहपृष्ठ
सुरक्षा-अपराध
पक्राउ परेका टोपबहादुर रायमाझीका छोरा सन्दीपलाई काठमाडौं लगिँदै

पक्राउ परेका टोपबहादुर रायमाझीका छोरा सन्दीपलाई काठमाडौं लगिँदै

बिहीबार, वैशाख २१, २०८० बागेश्वरी पोस्ट

नेपालगन्ज । नक्कली भुटानी शरणार्थी बनाउने धन्धामा मुछिएर पक्राउ परेका पूर्वउपप्रधानमन्त्री तथा नेकपा एमालेका सचिव टोपबहादुर रायमाझीका छोरा सन्दीप रायमाझीलाई आज काठमाडौं पठाइदै छ । हिजो साँझ उनी बुटवलबाट पक्राउ परेका थिए ।

काठमाडौं जिल्ला अदालतले टोपबहादुर र उनका छोरालाई हिजो पक्राउ पुर्जी जारी गरेको थियो । तर, टोपबहादुर भने पक्राउ परेका छैनन् । उनलाई पक्राउ गर्न पुर्जी जारी भइसकेको छ । पक्राउ पुर्जी जारी भइसकेपछि उनी अर्घाखाँचीको कार्यक्रम छाडेर बुटवल आएका थिए ।

उनले बुटवलमा आएर सभामुख देवराज घिमिरेसँग सल्लाह गरेका थिए । तर, राति ९ बजे भैरहवाबाट सँगसँगै आउने भनेका रायमाझी पक्राउ परिने डरले बुटवलमै बसे ।

अर्घाखाँचीमा भने उनले आफू काठमाडौं जाने र त्यसपछि बुझेर जानकारी गराउने भनेका थिए । उनले चेकका बारेमा आफूलाई केही थाहा नभएको समेत बताएका छन् । तर, पक्राउ परिने डरले बुटवलमै लुक्दा भने आशंका समेत उब्जिएको छ ।

उनी २०७७ पुस ५ मा प्रधानमन्त्री केपी शर्मा ओलीले संसद् विघटन गरेपछि मन्त्रिपरिषद् पुनर्गठन गर्दा ऊर्जामन्त्री भएका थिए ।

उनले भुटानी शरणार्थीलाई सहयोग पुगोस् भन्ने मानवीय भावनाले लबिङ गरेको दाबी गरे पनि गिरोहका सदस्यका तर्फबाट उनका छोरा सन्दीपका नाममा काटिएको १ करोड ५० लाखको चेक प्रहरीले बरामद गरेको जनाइएको छ ।

भुटानी शरणार्थी बनाएर अमेरिका लग्ने भन्दै ८ सय ७५ नेपालीबाट १० देखि ५० लाखसम्म ठगी गर्ने गिरोहसँग मिलेमतो गर्ने राजनीतिक तथा प्रशासनिक नेतृत्व कानूनी पकडमा तानिएको हो । यससम्बन्धी फेहरिस्त खोज पत्रकारिता केन्द्र नेपालले सार्वजनिक गरेको थियो ।

तत्कालीन गृहमन्त्री रामबहादुर थापा बादलका सल्लाहकार इन्द्रजित राई मंगलबार र उपराष्ट्रपति कार्यालयका सरकारका सचिव टेकनारायण पाण्डे बुधबार पक्राउ परेका छन् ।

नाइकेहरू केशव दुलाल, सानु भण्डारी, टंक गुरुङ, सन्देश शर्मा पोखरेल र सागर थुलुङ राई पक्राउ परेपछि उनीहरुबाट प्राप्त प्रमाण र बयानका आधारमा प्रहरीले थप अनुसन्धान गरिरहेको जनाएको छ ।

प्रकाशित मिति: बिहीबार, वैशाख २१, २०८० ०८:२०

प्रतिक्रिया दिनुहोस्