कपिलवस्तुमा सशस्त्र प्रहरीको तस्करी निस्तेज अभियान, पलायन हुँदै तस्कर

सुरक्षा-अपराध

गृहपृष्ठ
सुरक्षा-अपराध
कपिलवस्तुमा सशस्त्र प्रहरीको तस्करी निस्तेज अभियान, पलायन हुँदै तस्कर

कपिलवस्तुमा सशस्त्र प्रहरीको तस्करी निस्तेज अभियान, पलायन हुँदै तस्कर

शुक्रबार, असार १, २०८० बागेश्वरी पोस्ट

कपिलवस्तु । सशस्त्र प्रहरीको कपिलबस्तुमा तस्करी निस्तेज अभियान अन्तर्गत बर्तमान समयमा तस्करी शुन्य झै भएको छ ।

ठुला-साना तस्करी गरी ल्याइएका अवैध सामग्रीलाई नेपाली सीमामा सशस्त्र प्रहरीले कडा निगरानी गर्दै धमाधम नियन्त्रणमा लिएपछि तस्करहरु गुप्तबास बसिसकेका छन् ।

सशस्त्र प्रहरी नम्बर २८ गण कपिलबस्तुका प्रमुख सशस्त्र प्रहरी उपरीक्षक (एसपी) जीवन केसीले कमाण्ड सम्हाले यता तस्करी निस्तेज अभियान अन्तर्गत मातहतका जिल्लाभका बिओपी र बेसहरुले तस्कर र तस्करीको कडा निगरानी र छिटफुट ल्याउने साना अवैध समाग्रीलाई समेत बरामद गरिरहँदा कपिलवस्तुका तस्करहरुले यतिबेला भन्सार तिरेर नै सामग्रीहरु ल्याइएको पाइएको छ ।

'कपिलवस्तुमा सशस्त्र प्रहरीले तस्करविरुद्ध अपरेसन चलाइरहँदा ठुला तस्करहरु लगभग पलायन नै भएका छन् । खुला सीमा नाकाका कारण केही स-साना अवैध सामग्री ल्याएपनि हाम्रो टोलीले ती सामग्री समेत बरामद गर्दै आएको छ', एसपी केसीले बताए।

एसपी केसीका अनुसार सशस्त्र प्रहरीको सचेतना अभियानले आजभोलि सर्वसाधारणले पनि भन्सार कर तिरेर सामग्रीहरु ल्याउने गरिरहेका छन् ।

९३ किलोमीटर लामो सीमा रहेको कपिलवस्तुमा धेरै त्यस्ता नाकाहरु भएपनि जिल्लाभर सशस्त्र प्रहरीको गस्ती, अमुगमन तथा एसपी केसीले आफ्ना मातहतका युनिट कमाण्डरहरुलाई दिएको कडा निर्देशनले जुन नाकाबाट अवैध सामग्री ल्याएपनि बरामद गरेपछि तस्करहरु नै बैकल्पिक बाटो रोज्दै अन्य व्यवसाय गर्न बाध्य बन्दै आएका छन् ।

कपिलवस्तुमा सशस्त्र प्रहरी एसपी केसी आफैँ भारतीय सशस्त्र सिमा बल (एसएसबी) सँग तस्करी नियन्त्रणका विषयमा समेत अन्तरक्रिया गर्दै आएका छन् । यति मात्रै हैन एसपी केसीले 'एक रात बिओपी र एक दिन सीमा स्तम्भ निगरानी' गर्दै त्यहाँको बस्तु अवस्था बुझ्दै आएका छन् ।

कपिलवस्तुमा सशस्त्र प्रहरीको निगरानी बढ्दा सीमामा हुने अपराध, लागूऔषध कारोबार, मानव बेचबिखन जस्ता जघन्य अपराध बन्द झै भएका छन् ।

एसपी भन्छन्, "हाम्रो कार्य सीमामा हुने अपराध, अवैध गतिविधि लगायत भन्सार राजस्व वृद्धि गर्नु पनि हो, हाम्रो टोलीले २४ सै घण्टा सीमामा निगरानी गर्दै आउँदा तस्करहरुको मनोबल कमजोर भएर पलायन हुँदै गएको अवस्था छ ।"

दुई दिन अघि मात्र लुकिछिपी भारतबाट अवैध सामग्री ल्याउने क्रममा जिल्लास्थित मर्यादापुर बिओपीले सिद्दार्थनगर नगरपालिका वडा नं. ३ सेमरहवामा २ लाख रुपैयाँ बराबरको अवैध लत्ताकपडा एबं जुत्ताचप्पल बरामद गरेपछि तस्करी बन्द झै बनेको एसपी केसीले बताए ।

एसपी केसीले जिल्ला कमाण्ड सम्हालेको ५ महिना ७० लाख रुपैयाँ बराबरको अवैध सामग्री बरामद गर्न सफल भइसकेका छन् । उनले अवैैैध सामग्री बरामद गर्दै साना तस्करहरुले प्रयोग गर्ने मोटरसाइकल, साइकल, स्कुटर लगायत सवारी साधन समेत बरामद गरेपछि तस्करहरुको बिचल्ली भएको हो ।

तस्करी निस्तेज अभियान अन्तर्गत सशस्त्र प्रहरीको सर्हानीय कार्यप्रति कपिलवस्तुमा व्यापारीहरु हर्षित भएका छन् । उनीहरु भन्छन्, ' खुला सीमाका कारण केही मात्रा तस्करी भएपनि सशस्त्र प्रहरीको निगरानीले बरामद भइहाल्ने डरले तस्करहरु पलायन हुँदा राज्यलाई कर तिरेर समग्र व्यापार व्यावसाय गर्ने व्यापारीहरुलाई राहत मिलेको छ ।'

प्रकाशित मिति: शुक्रबार, असार १, २०८० १२:४९