अबदेखि रुट प्रमिटका लागि बुटवल जान नपर्ने

समाचार

गृहपृष्ठ
समाचार
अबदेखि रुट प्रमिटका लागि बुटवल जान नपर्ने

अबदेखि रुट प्रमिटका लागि बुटवल जान नपर्ने

बुधबार, असार ६, २०८० बागेश्वरी पोस्ट

नेपालगन्ज । अबदेखि अन्तर प्रदेशीय रुट प्रमिट सबै यातायात व्यवस्था कार्यालयबाट लिन सकिने भएको छ ।

यस अघि अन्तर प्रदेशीय रुट प्रमिट संघीय सरकार मातहतमा रहेको बुटवल कार्यालयबाट मात्रै दिने गरिएको थियो । जसले गर्दा यातायात व्यवसायीहरुले सास्ती भोग्दै आएका थिए । रुट प्रमिटका लागि बुटवल जानै पर्ने बाध्यताको अन्त्य भएपछि यातायात ब्यबसायीले राहात खुसी भएका छन् ।

मुख्यमन्त्री डिल्लीबहादुर चौधरीको निर्देशनपछि मन्त्रालयले सबै यातायता कार्यालयबाट बाटो इजाजत दिन असार ५ गते नै परिपत्र गरि सकेको छ ।

संघीय कार्यालयबाट मात्रै बाटो इजाजत दिने गरी गरिएको निर्णयलाई बदर गर्दै अब प्रदेशका सबै यातायात व्यवस्था कार्यालय र सेवा कार्यालयबाट रुट इजाजत प्रदान गर्न थालिएको छ ।

प्रदेश मातहत कै यातायात कार्यालयबाट बाटो इजाजत सञ्चालन गर्न उद्योग पर्यटन तथा यातायात व्यवस्था मन्त्रालयले मातहतका सबै कार्यालयलाई बाटो इजाजत दिन परिपत्र गरेको हो ।

असार ५ गतेदेखि कार्यान्वयन हुने गरी दाङ यातायात, बाँके यातायात, बुटवल सवारी कार्यालय र जिल्ला स्तरमा स्थापना भएका सबै यातायात व्यवस्था सेवा कार्यालयलाई परिपत्र गरिएको मन्त्रालयका शाखा अधिकृत रामप्रसाद घिमिरेले जानकारी दिए ।

पहिलेको रुट प्रमिटको निर्णयप्रति गुनासो बढेपछि त्यसको सहजीकरण गर्दै प्रदेश सरकारकै मातहतमा रहेका यातायात कार्यालयबाट नै बाटो रुट प्रमिट दिने व्यवस्था गरिएको मुख्यमन्त्री चौधरीले जानकारी दिए ।

सेवामा सहजता ल्याउन र प्रदेश सरकारको मातहतमा आइसकेको अधिकार पूर्णरुपमा कार्यान्वयनको चरणमा लगेको मुख्यमन्त्री चौधरीले बताए ।

अन्य प्रदेशमा दर्ता भएका सवारी कर पनि अबदेखि सबै कार्यालयबाटै लिइने भएको छ ।

अन्तर प्रदेश दर्ता भएका सवारी साधनको समेत कर सबै यातायता व्यवस्था कार्यालय र सेवा कार्यालयहरुमा निर्देशन गरिएको मुख्यमन्त्री चौधरीले बताए ।

पहिले निश्चित कार्यालयबाट मात्रै अन्तर प्रदेशमा दर्ता भएका सवारीको कर लिन सक्ने व्यवस्था रहेको थियो । अबदेखि यातायात कार्यालयहरुले भिआएस प्रणालीको प्रयोग पहुँच लिई अन्तर प्रदेश दर्ता भएका सवारी साधनको कर लिन परिपत्र गरिएको छ ।

प्रकाशित मिति: बुधबार, असार ६, २०८० १६:२३

प्रतिक्रिया दिनुहोस्