कोहलपुरबाट पाटेबाघको छाला र हड्डीसहित चार जना पक्राउ

सुरक्षा-अपराध

गृहपृष्ठ
सुरक्षा-अपराध
कोहलपुरबाट पाटेबाघको छाला र हड्डीसहित चार जना पक्राउ

कोहलपुरबाट पाटेबाघको छाला र हड्डीसहित चार जना पक्राउ

बिहीबार, असार २१, २०८० बागेश्वरी पोस्ट

नेपालगन्ज । प्रहरीले कोहलपुरबाट पाटेबाघको छालासहित चार जनालाई पक्राउ गरेको छ ।

कोहलपुर -११ बाट लुम्बिनी प्रदेश अनुसन्धान ब्यूरो र इलाका प्रहरी कार्यालय कोहलपुरको संयुक्त टोलीले ९ फिट ८ इन्चको एक थान बाघको छाला र ६ किलो ८ सय १८ ग्राम हड्डीसहित चार जनालाई पक्राउ गरेको हो ।

प्रहरीका अनुसार पक्राउ पर्नेमा भगवतीमाई गाउँपालिका-५ दैलेखका ३३ वर्षीय प्रवीणकुमार केसी, दैलेखस्थित ठाँटीकाँध गाउँपालिका-४ का ३० वर्षीय सुनिल चुनारा, पञ्चदेवल गाउँपालिका-२ अछामका ३६ वर्षीय लोकेन्द्र शाही र बारकोट गाउँपालिका-३ जाजरकोटका ५२ वर्षीय कर्णबहादुर रोकाय रहेका छन् ।

पक्राउ गरेका चारै जनासहित बरामद गरिएको बाघको छाला र हड्डीलाई प्रहरीले डिभिजन कार्यालय बाँकेको जिम्मा लगाएको छ । डिभिजन वन कार्यालय बाँकेका अनुसार बरामद गरिएको बाघको घाँटीको छालामा दुई ठाउँमा गोलीको प्वाल देखिएको छ ।

वन कार्यालयले जनाए अनुसार हड्डी वयस्क पोथी बाघको रहेको छ भने हड्डी कतिवटा बाघको हो भन्नेबारे अनुसन्धान भइरहेको बताइएको छ ।

पक्राउ परेका चारै जनालाई राष्ट्रिय निकुञ्ज तथा वन्यजन्तु संरक्षण ऐन, २०२९ को दफा २६ को उपदफा १ का अनुसार अनुसन्धान अगाडि बढाइएको छ ।

प्रकाशित मिति: बिहीबार, असार २१, २०८० १०:४७

प्रतिक्रिया दिनुहोस्