रुपन्देहीबाट ३० लाखको कपडा र मकवानपुरमा ट्रकसहित ९२० किलो गाँजा बरामद

सुरक्षा-अपराध

गृहपृष्ठ
सुरक्षा-अपराध
रुपन्देहीबाट ३० लाखको कपडा र मकवानपुरमा ट्रकसहित ९२० किलो गाँजा बरामद

रुपन्देहीबाट ३० लाखको कपडा र मकवानपुरमा ट्रकसहित ९२० किलो गाँजा बरामद

सोमबार, असोज १, २०८० बागेश्वरी पोस्ट

काठमाडौं । सशस्त्र प्रहरी देशभरका विभिन्न स्थानबाट ठूलो परिमाणमा अवैध सामग्री र करिब एक क्विन्टल गाँजा बरामद गरेको छ ।

अवैध सामग्री बरामदकै क्रममा रुपन्देहीबाट सशस्त्र प्रहरीले लाखौं रुपैयाँ बराबरको लत्ताकपडा बरामद गरेको छ ।

जिल्लाको रोहीणी गाउँपालिका-५ स्थित तरकुलहवाबाट घरमा लुकाई राखिएको अवस्थामा सशस्त्र प्रहरी ३० लाख रुपैयाँको अवैध लत्ताकपडा बरामद गरेको सशस्त्र प्रहरी बल लुम्बिनी प्रदेश प्रमुख डीआईजी अभि खत्रीले जानकारी दिएका छन् ।

डीआईजीका खत्रीका अनुसार विशेष सूचना पाएर खटिएको सशस्त्र प्रहरीको प्रस्तावित सीमा सुरक्षा गुल्म डण्डाको टोलीले दुई जना स्थानीयको घरमा लुकाइराखेको अवस्थामा ३० बोरा लत्ताकपडा र २ पोका प्लाष्टिक लेमिलेशन पेपर बरामद गरेको हो ।

आइतबार बरामद गरिएको ३० लाख रुपैयाँ बराबरका उक्त अवैध लत्ताकपडा तथा सामाग्रीलाई आबश्यक कारबाहीका लागि भैरहवा भन्सार बुझाएको डीआईजी खत्रीले जानकारी दिएका छन् ।

सशस्त्र प्रहरी लुम्बिनीको कमान्ड सम्हालेपछि डीआईजी खत्रीले तस्करीविरुद्ध खरोरुपमा उत्रन निर्देशन दिँदै गर्दा सशस्त्र प्रहरीले लुम्बिनीमा तस्करीविरुद्ध झनै खरो रुपमा उत्रँदै आएको छ ।

त्यस्तै मकवानपुरस्थित सशस्त्र प्रहरी बल नेपाल नं. १४ गणले भारतीय कन्टेनरमा ल्याउँदै गरिएको ९ सय २० किलो गाँजा, कन्टेनरसहित दुई जनालाई नियन्त्रणमा लिएको छ ।

चितवनको खुरखुरेबाट वीरगन्जतर्फ जाँदै गरेको एन.एल. ०१ ए.सी. २१४५ नम्बरको भारतीय कन्टेनरमा फल्स बटम बनाई लुकाईछिपाई लैजाँदै गरेको उक्त गाँजा बरामद गरेको हो ।

सशस्त्र प्रहरीले पाएको विशेष सूचनाको आधारमा सशस्त्र प्रहरी बल नेपाल नं. १४ गण मकवानपुरबाट खटिएको टोलीले हेटौडा-१० बसपार्कस्थित पूर्व–पश्चिम लोकमार्गबाट ९ सय २० किलो गाँजासहित उनीहरुलाई नियन्त्रणमा लिएको सशस्त्र प्रहरीले जनाएको छ ।

सशस्त्र प्रहरीका अनुसार गाँजासहित पक्राउ पर्नेमा भारतको बलरामपुर जिल्लास्थित बिर्तापुरका ४५ वर्षीय दुलारे यादव र ३६ वर्षीय योगेश वर्मा रहेका छन् ।

बरामद गरिएको गाँजासहितको कन्टेनर र पक्राउ परेका दुई जनालाई आवश्यक कारवाहीको लागि जिल्ला प्रहरी कार्यालय मकवानपुरमा पठाएको सशस्त्र प्रहरीले जनाएको छ ।

प्रकाशित मिति: सोमबार, असोज १, २०८० १२:१६

प्रतिक्रिया दिनुहोस्