चलचित्र छायांकन स्थल प्रवर्द्धनका लागि अन्तरक्रिया

मनोरञ्जन

गृहपृष्ठ
मनोरञ्जन
चलचित्र छायांकन स्थल प्रवर्द्धनका लागि अन्तरक्रिया

चलचित्र छायांकन स्थल प्रवर्द्धनका लागि अन्तरक्रिया

आइतबार, पुस २९, २०८० बागेश्वरी पोस्ट

नेपालगन्ज । चलचित्र पत्रकार संघ नेपाल बाँके शाखाले चलचित्र छायांकनका लागि उपयुक्त स्थल र पर्यटन प्रवद्र्धनका लागि सरोकारवालासंग आज अन्तरक्रिया गरेको छ । गीत, संगीत र चलचित्र निर्माण गर्नका लागि बाँके बर्दिया जिल्लामा रहेका उपयुक्त ठाउँहरूको बारेमा स्थानीय कलाकार, पत्रकार, पर्यटन व्यवसायी, होटेल व्यवसायी, सिनेमा हल सन्चालक लगायतसंग अन्तरक्रिया गरिएको हो ।

बाँकेको डुडुवा गाउँपालिकाको कम्दी नजिकै रहेको पिकनिक स्थलमा आयोजना गरिएको अन्तर्क्रियामा सहभागीहरुले यहाँका धार्मिक, सांस्कृतिक, सामाजिक मूल्यमान्यता झल्कने स्थानीय चाडवाड, गाउँ, तालतलैया, बाटो, पूल, नदी लगायत समावेश गर्न सकिने सम्भावना रहेको बताए ।‌

कलाकार सुन्दर गुरुङले गुरुवागाउँ मेला, जोगागाउँ मेला लगायतका यहाँका मौलिक मेलाहरु चलचित्रमा समावेश गर्न सकिने बताए । साथै यहाँका ग्रामीण वस्ती, ग्रामीण क्षेत्र, बाटो, नदी, पुल, ताल लगायत छायांकनका लागि उपयुक्त रहेको उनले बताए ।‌

कार्यक्रममा सहभागीहरुले बाँके राष्ट्रिय निकुञ्ज, गाभर, अगैया, राप्ती पुल लगायतका स्थानहरु छायांकनका लागि उपयुक्त रहेको सुझाएको चलचित्र पत्रकार संघ बाँके शाखाका अध्यक्ष रामचन्द्र पौडेलले बताए । संकलन गरिएका सुझावहरुसहित संघले आगामी जेठमा छायांकन स्थलहरू समेटिएको बुकलेट प्रकाशन गर्ने तयारी गरिरहेको संघका सचिव बिक्रम बुढा क्षेत्रीले बताए ।

सहभागीहरुले यो काम एतिहासिक भएको बताउँदै विद्यालयहरुले स्थानीय पाठ्यक्रममा पढ्न पाउने गरी बुकलेट निर्माण गर्न सुझाव दिए । संघले सक्रियरुपमा नियमित कार्यक्रम गरिरहेको बताउँदै संघका सल्लाहकार कमल खत्रीले यससंगै व्यवसायिकरुपमा चलचित्र पत्रकारिता गर्न पनि सुझाव दिए ।

नेपाल पत्रकार महासंघ लुम्बिनी प्रदेशका उपाध्यक्ष शुक्रऋषि चौलागाईको प्रमुख आथित्यतामा भएको कार्यक्रममा बरिष्ठ कलाकार कैलाश प्रविण, श्यामानन्द सिंह, कमल विक निर्मोही, सुन्दर गुरुङ, विरेन्द्र यादव, जिनु, अनिता लामिछाने, नाट्टा बाँकेका अध्यक्ष श्रीराम सिग्देल, पत्रकार झलक गैरे, नेपाल पत्रकार महासंघ बाँकेका उपाध्यक्ष करुणा शाह, बागेश्वरी सिनेमा हलका म्यानेजर, सिने रोयल लगायतका ७० बढीको उपस्थिति थियो ।

संघका नयाँ सदस्यहरुलाई स्वागत पनि गरिएको उक्त कार्यक्रमको सन्चालन संघका उपाध्यक्ष समिरमान श्रेष्ठले गरेका थिए ।

प्रकाशित मिति: आइतबार, पुस २९, २०८० २१:३८