संगीतकार तथा गायक सन्तोषले दोस्रोपटक गिनिज बुकमा नाम लेखाए

मनोरञ्जन

गृहपृष्ठ
मनोरञ्जन
संगीतकार तथा गायक सन्तोषले दोस्रोपटक गिनिज बुकमा नाम लेखाए

संगीतकार तथा गायक सन्तोषले दोस्रोपटक गिनिज बुकमा नाम लेखाए

बिहीबार, चैत ८, २०८० बागेश्वरी पोस्ट

नेपालगञ्ज । दङ्गाली श्रष्टा संगीतकार तथा गायक सन्तोष श्रेष्ठले दोस्रोपटक विश्व रेकर्ड राख्न सफल भएका छन् । श्रेष्ठले पहिलोपटक ५० देशका ५० भाषामा संगीत गरिएको 'ढुकढुकी भित्र तिम्रो.....' बोलको गीतबाट गिनिज बुक अफ वल्र्ड रेकर्डमा आफ्नो नाम समाबेश गर्न सफल भएका थिए । संगीतकार श्रेष्ठले विश्वको सबैभन्दा अग्लो स्थानमा वाद्यवादन सहितको प्रत्यक्ष गायन र म्युजिक भिडियो छायांकन गरिएको गीत 'तिलिचो ताल.....' बाट फेरि गिनिज बुक अफ वर्ल्ड रेकर्डको दोस्रो प्रमाणपत्र प्राप्त गरेका हुन् ।

'तिलिचो ताल' गीतमा शब्द डि.आर. उपाध्यायको रहेको छ भने संगीत सन्तोष श्रेष्ठ र स्वर सागर अधिकारीको रहेको छ । यो गीत मनाङ जिल्लामा रहेको तिलिचो ताल भन्दा माथि ५ हजार १०५ मिटर उचाईमा प्रत्यक्ष वाद्यवादन, गायन, रेकर्डिङ र छायांकन गरिएको हो । यो बिधामा २०७४ असोज १० गते ४ हजार ७ सय ६८ मिटर उचाईमा माधव खरेल लगायतको समूहले पहिलोपटक कीर्तिमान राखेको थियो । त्यसपछि सञ्चबहादुर राई लगायतको समूहले ४ हजार ८ सय १३ मिटर उचाईमा छायांकन गरेर खरेल समूहको कीर्तिमान भङ्ग गर्न सफल भएको थियो । उक्त गीत २०७९ बैशाखको ९ गते ५ हजार १ सय ५ मिटर उचाईमा रेकर्डिङ र छायांकन गरिएको थियो ।

श्रेष्ठले संगीत दिएको संचारकर्मी लोकराज अधिकारीको शब्द रहेको 'तिमीले पराई ठानेपछि....' गीतले सबैभन्दा धेरै पटक सिआरबिटि र पिआरबिटि डाउनलोडको रेकर्ड पनि राखेको थियो । त्यस्तै पछिल्लो समय सन्तोष स्वयंले संगीत र स्वर दिएको महाकवि लक्ष्मी प्रसाद देवकोटाको शब्दमा रहेको 'आकाशमा शशी छन्.....' बोलको गीत पनि निकै चर्चामा रहेको छ ।

प्रकाशित मिति: बिहीबार, चैत ८, २०८० १३:४७