खजुरा-८ रनियापुरमा विकासको प्रभाव देखिँदै

स्थानीय

गृहपृष्ठ
स्थानीय
खजुरा-८ रनियापुरमा विकासको प्रभाव देखिँदै

खजुरा-८ रनियापुरमा विकासको प्रभाव देखिँदै

आइतबार, जेठ १३, २०८१ बागेश्वरी पोस्ट

रविन्द्र घिमिरे
खजुरा (बाँके) । संघीयताको कार्यान्वयनसँगै स्थानीय सरकारले काम गर्न थालेपछि बाँकेको खजुरा गाउँपालिका वडा नम्वर ८ रनियापुरमा विकासको प्रभाव देखिन थालेको छ । पिछडिएको वडाको रुपमा चिनिँदै आएको यो वडाका स्थानीय जनप्रतिनिधिहरुले पछिल्लो समय योजना निर्माण गरी काम शुरु गरेपछि वडाले क्रमशः विकासको गति लिन थालेको हो । वडामा पछिल्लो समय भौतिक पूर्वाधार तथा सडक निर्माणका साथै शिक्षा तथा स्वास्थ्यमा प्रगति हुँदै गएको छ ।

निर्वाचन अघि अनेकन समस्या झेलिरहेको खजुरा गाउँपालिका वडा नम्बर ८ मा जनप्रतिनिधि आएसँगै विकासका योजना निर्माणले तीब्रता पाएको छ । रनियापुरमा समग्र पूर्वाधार, शिक्षा ,स्वास्थ्य ,कृषितर्फ काम धमाधम भइरहेको छ । हाल खजुराको रनियापुरका प्रायः सबै टोलमा सडकको स्तरोन्नति भएको छ भने केही निर्माणाधीन अवस्थामा रहेका छन् । त्यस्तै सामुदायिक विद्यालय, मन्दिर, मस्जिद र मदरसाको भवन निर्माणमा समेत वडाले लगानी गरेको छ ।

अन्य वडाहरुको तुलनामा खजुरा गाउँपालिकाको ८ नम्बर वडा रनियापुर विकास र समृद्धिका हिसाबले अग्रपङ्क्तिमा रहेको छ । विकास निर्माणमा भइराखेका कार्यप्रगतिबाट स्थानीयहरु समेत सन्तुष्ट देखिएका छन् । वडामा हुने गरेका निर्माण कार्यमा वडाबासीहरुलाई नै रोजगारी पनि दिने भएकोले झनै खुशी र सन्तुस्ट भएको स्थानीयहरु बताउँछन् । स्थानीयहरु हरिराम थारु, मोविन खाँ, सरिता थारु र डाउट खाँ वडाका कामदेखि सन्तुष्ट भएको बताउँछन् ।

आफू दोस्रो कार्यकालको लागि निर्वाचित भएर आइसकेपछि धेरै ठाउँमा पीच, पिसिसी, नालीहरु निर्माण भइसकेको वडा अध्यक्ष फिरोज खाँ बताउँछन् । शिक्षा, स्वास्थ्य, कृषिमा लगानी लगाउनुका साथै कुनै विभेद नगरिकन मन्दिर, मस्जिदहरुमा समेत काम गरिसकेको उनको भनाई छ । तर, सीमित बजेटका कारण विकासले गति लिन नसकेका टोलहरुमा योजना निर्माण गरे पनि काम हुन नसकेको वडा अध्यक्ष खाँ बताउँछन् । प्रदेश सरकार, संघीय सरकार र गाउँपालिकाबाट कुनै पनि सहयोग नपाएकोले थोरै बजेटमा काम गर्न समस्या भएको उनको भनाई छ ।

प्रकाशित मिति: आइतबार, जेठ १३, २०८१ २२:००

प्रतिक्रिया दिनुहोस्