जनप्रतिनिधि र कर्मचारीलाई सूचनाको हक र सुशासनका बारेमा अभिमुखीकरण

स्थानीय

गृहपृष्ठ
स्थानीय
जनप्रतिनिधि र कर्मचारीलाई सूचनाको हक र सुशासनका बारेमा अभिमुखीकरण

जनप्रतिनिधि र कर्मचारीलाई सूचनाको हक र सुशासनका बारेमा अभिमुखीकरण

शनिबार, असार १, २०८१ बागेश्वरी पोस्ट

नेपालगञ्ज । वडास्तरका जनप्रतिनिधि र कर्मचारीलाई सूचनाको हक र सुशासनका बारेमा क्षमता अभिबृद्धि गरिएको छ । नेपालगञ्ज उपमहानगरपालिका १० नम्बर वडा कार्यालयको सहयोगमा सूचना र मानव अधिकार अनुसन्धान केन्द्रले शुक्रबार आयोजना गरेको अभिमुखीकरणमा वडाका जनप्रतिनिधि र कर्मचारीहरुलाई सूचनाको हक र सुशासनका बारेमा जानकारी गराइएको हो ।

अभिमुखीकरणमा सूचनाको हकको प्रयोग, उपयोगिता, फाइदा, सूचना प्रवाह, सूचनाको हक सम्वन्धि ऐन, स्थानीय तहमा सुशासनको पारदर्शिता, सार्वजनिक सुनुवाई, सामाजिक परीक्षण लगायतका विषयमा अधिबक्ता विश्वजित तिवारी, पत्रकार शुक्रऋषि चौलागाई र राकेशकुमार मिश्रले सहजीकरण गरेका थिए ।

कार्यक्रममा वडा अध्यक्ष श्रवणकुमार श्रेष्ठले स्थानीय तहमा सुशासनको कार्यलाई प्रभावकारी ढङ्गले अघि बढाउने प्रतिबद्धता गर्दै वडाबासीलाई चाहिने सबै सूचना सहजरुपमा प्रवाह भइरहेको जानकारी दिए । उनले वडा कार्यालयबाट गुणस्तरीय सेवा उपलब्ध भइरहे पनि कसैलाई कुनै बाधा अवरोध भएमा तत्काल जनप्रतिनिधिलाई जानकारी गराउन आग्रह गरे ।

कार्यक्रममा कार्यपालिका सदस्य विना थापा, वडा सदस्यहरु दिपेन्द्रकुमार श्रेष्ठ, भरतध्वज शाही, मिना चमार, वडा सचिव शान्ता घर्ति लगायतले आ–आफ्नो जिज्ञासा राखेका थिए ।

अभिमुखीकरणमा वडा समितिका पदाधिकारी र विषयगत शाखाका कर्मचारीहरुको सहभागिता रहेको थियो ।

प्रकाशित मिति: शनिबार, असार १, २०८१ ०७:३०