बाँकेमा सवा करोडको अवैध सामान बरामद, १७ सय सवारीसाधन कारबाहीमा

सुरक्षा-अपराध

गृहपृष्ठ
सुरक्षा-अपराध
बाँकेमा सवा करोडको अवैध सामान बरामद, १७ सय सवारीसाधन कारबाहीमा

बाँकेमा सवा करोडको अवैध सामान बरामद, १७ सय सवारीसाधन कारबाहीमा

बिहीबार, असार ६, २०८१ बागेश्वरी पोस्ट

बाँके । एसपी तुलबहादुर कार्की नेतृत्वको बाँके प्रहरीले जेठ महिनामा मात्रै सवा करोड बढीको अवैध सामान बरामद गरेको छ । जिल्ला प्रहरी बाँकेले जेठ महिनामा मात्रै १ करोड ३१ हजार ९८० रुपैयाँ बराबरको भन्सार छली गरेर ल्याइएका अवैध सामान बरामद गरेको हो ।

बाँके प्रहरी पछिल्लो जेठ महिनामा मात्रै अवैध उत्खनन लगायत अवैध सामान नियन्त्रणमा थप कडाई गर्दै उक्त रकम बराबरको अवैध सामान बरामद गरेको जनाएको छ ।

बाँकेमा जेठ महिनामा प्रहरीले चलाएको अपरेशनमा चोरीको बस, बोलेरो जीप लगायत ७ वटा मोटरसाइकल समेत बरामद गरेको छ । त्यसैगरी अवैध उत्खननमा संंलग्न भएका ५ वटा जेसिबी र ६ टिपरलाई कारबाही गर्दै १ लाख ४५ हजार रुपैयाँ राजश्व उठाएको जिल्ला प्रहरी बाँकेले जानकारी दिएको छ ।

यस्तै बाँके प्रहरीले चलाएको कारबाहीमा २ लाख ५८ हजार रुपैयाँ बराबरको भारतबाट अवैधरुपमा ल्याइएको करीव २ क्विन्टल बोइलर खुकुरा र १८ सय चल्ला बरामद गर्दै आबश्यक कारबाहीका लागि क्वारेन्टाइन कार्यालयमा पठाएको जनाएको छ ।

जेठ महिनामा १७१३ सवारीसाधनलाई कारबाही गर्दै १४ लाख ६१ हजार ५ सय रुपैयाँ राजश्व संकलन गरेको छ । बाँके प्रहरीले सवारी धनी नखुलेका १२१ वटा मोटरसाइकल र स्कुटर लिलाम गर्दै ६ लाख १२ हजार रुपैयाँ राजश्व संकलन गरेको जनाएको छ ।

त्यसैगरी जेठमा जिल्ला प्रहरी कार्यालय बाँकेमा दर्ता भएका १७२ मुद्दाहरुमा १२७ जनालाई पक्राउ गरेर अनुसन्धान गर्दै कानुनी कारबाही गरिएको छ । प्रक्रिया अगाडि नबढेका ६३ मुद्दालाई जेठ महिनामै फर्छ्यौट गरिएको हो । ठाडो उजुरीतर्फ बाँके प्रहरीमा आएको ४९९ मध्ये ३५१ लाई फछ्र्यौट गरिएकोमा १५ वटा सम्बन्धित निकायमा पठाइएको छ भने १३३ वटा उजुरी फर्छ्यौट गर्न बाँकि रहेको बाँके प्रहरीले जनाएको छ ।

फरार प्रतिवादी पक्राउ अभियान अन्तर्गत जेठमा ४४ जनालाई पक्राउ गर्दै त्यसबापत १८ वर्ष २ महिना २९ दिन कैद र २३ लाख ७९ हजार २७४ रुपैयाँ राजश्व संकलन गरिएको जिल्ला प्रहरी बाँकेले जनाएको छ ।

जिल्ला प्रहरी बाँकेले जेठ महिना चोरी भएका ७ थान मोबाइल फेला पार्दै सम्बन्धित मोबाइल धनीलाई बुझाएको छ भने चार जना मोटरसाइकल चोरलाई पक्राउ गर्नुका साथै ९ वटा चोरी भएका मोटरसाइकल फेला पारेको छ । त्यस्तै स्कुटर चोरीमा संंलग्न रहेका दुई जनालाई स्कुटरसहित नियन्त्रणमा लिएर कारबाही गरेको बाँके प्रहरीले जनाएको छ ।

यसैगरी बाँके प्रहरीको महिला तथा बालबालिका सम्बन्धि ११ मुद्दा अन्तर्गत ३ मुद्दाका आरोपीलाई पक्राउ गरी कारबाही प्रक्रियामा ल्याएको छ । घरेलु हिंंसाको उजुरीतर्फ ६१ मध्ये ३१ वटा फर्छ्यौट गरिएको र अन्य उजुरीको अनुसन्धान भइरहेको जिल्ला प्रहरी बाँकेले जानकारी दिएको छ ।

बाँके प्रहरीले महिला, बालबालिका तथा जेष्ठ नागरिक सम्बन्धि हराएका ९ वटा निवेदनमा ३ जनालाई फेला पार्दै परिवारको जिम्मा लगाएको जनाएको छ ।

प्रकाशित मिति: बिहीबार, असार ६, २०८१ १०:०२

प्रतिक्रिया दिनुहोस्