फरार प्रतिवादी पक्राउ गर्दा अवरोध भएपछि गोली चल्यो, एक जना घाइते

सुरक्षा-अपराध

गृहपृष्ठ
सुरक्षा-अपराध
फरार प्रतिवादी पक्राउ गर्दा अवरोध भएपछि गोली चल्यो, एक जना घाइते

फरार प्रतिवादी पक्राउ गर्दा अवरोध भएपछि गोली चल्यो, एक जना घाइते

बिहीबार, असार २०, २०८१ बागेश्वरी पोस्ट

नेपालगन्ज । जिल्ला प्रहरी कार्यालय बाँकेले डाँका चोरी मुद्दाका एक जना फरार प्रतिवादीलाई पक्राउ गर्ने क्रममा प्रहरीले ३ राउन्ड गोली फायर गर्दा स्थानीय एक युवक घाइते भएका छन् ।

जिल्ला अदालत बाँकेको २०७० असार १८ गतेको फैसलाले डाँका चोरी मुद्दामा दोषी ठहर भएर ६ वर्ष कैद र १२ हजार रुपैयाँ जरिवाना सजाय पाएर फरार रहेका सरमान सिंह सरदारलाई जिल्ला प्रहरी बाँके र इलाका प्रहरी कार्यालय हिरमिनियाबाट खटिएको टोलीले डुडुवा गाउँपालिका-६ शिखनपुरुवाबाट पक्राउ गर्न लाग्दा स्थानीयवासीहरुले अवरोध गर्दै प्रहरीमाथि ढुङ्गामुडासहित आक्रमण गरेपछि र प्रहरीकै हतियार खोस्न खोज्दा आत्मरक्षाका लागि प्रहरीले ३ राउन्ड गोली चलाएको जिल्ला प्रहरी बाँकेले जनाएको छ।

प्रहरीले हानेको गोली लागेर स्थानीय ३० वर्षीय नानक सिंह सरदार घाइते भएका छन् । उनको खुट्टामा गोली लागेको प्रहरीले जनाएको छ । साढे ८ बजेबाट सुरु भएको स्थानीयवासीको अवरोधलाई प्रहरीले करीब आधा घण्टासम्म प्रतिवाद गरेपछि सरदारलाई नियन्त्रणमा लिन सफल भएको बाँके प्रहरीले जनाएको छ ।

स्थितिलाई नियन्त्रणमा लिने क्रममा इलाका प्रहरी हिरमिनियाका एक जना वरिष्ठ प्रहरी हवल्दार घाइते भएको जनाएको छ । गोली लागेर घाइते नानक, फरार प्रतिवादी सरदार र घाइते भएका वरिष्ठ प्रहरी हवल्दारको पनि भेरीमै उपचार भइरहेको प्रहरीले जनाएको छ ।

प्रकाशित मिति: बिहीबार, असार २०, २०८१ १३:३९

प्रतिक्रिया दिनुहोस्