खुकुरी प्रहारबाट दुई युवा गम्भीर, वडा अध्यक्ष पक्राउ, तरुण दलको भत्सर्ना

सुरक्षा-अपराध

गृहपृष्ठ
सुरक्षा-अपराध
खुकुरी प्रहारबाट दुई युवा गम्भीर, वडा अध्यक्ष पक्राउ, तरुण दलको भत्सर्ना

खुकुरी प्रहारबाट दुई युवा गम्भीर, वडा अध्यक्ष पक्राउ, तरुण दलको भत्सर्ना

कारबाहीको माग गर्दै कोहलपुरमा प्रदर्शन

आइतबार, भदौ २, २०८१ बागेश्वरी पोस्ट

नेपालगञ्ज । बाँके राप्तीसोनारीमा खुकुरी प्रहारबाट दुई युवा गम्भीर घाइते भएका छन् ।

खुकुरी प्रहारबाट बैजनाथ गाउँपालिका वडा नम्बर ७ प्रशुरामपुरका २८ वर्षीय सुलभ मल्ल र राप्तीसोनारी गाउँपालिका वडा नम्बर २ का २८ वर्षीय सन्दिप बिष्ट गम्भीर घाइते भएको बाँके प्रहरीले जनाएको छ । मल्लको बायाँ कोखामा र बिष्टको दुवै हातको कुममा गहिरो चोट लागेको छ । घाइतेहरुको भारतको लखनउमा उपचार भइरहेको छ ।

जिल्ला प्रहरी प्रमुख प्रहरी उपरीक्षक तुलबहादुर कार्कीले शनिबार बेलुकी राप्तीसोनारी वडा नम्बर ५ बिनौना चोकमा एक समूहले उनीहरूमाथि खुकुरी प्रहार गरेको बताए । घटनाका बारेमा सोधपुछका लागि चार जनालाई नियन्त्रणमा लिइएको जिल्ला प्रहरी प्रमुख कार्कीले जानकारी दिए ।

घटनामा संलग्न रहेको आरोपमा एमाले निकट युवा संघ नेपाल बाँकेका अध्यक्ष समेत रहेका राप्तीसोनारी–२ का वडाअध्यक्ष ‘ज्ञानु’ भनिने ज्ञानेन्द्रराज ओलीसहित ४ जनालाई नियन्त्रणमा लिइएको एसपी कार्कीले बताए । घाइते हुने दुबै जना नेपाली कांग्रेस निकट तरुण दलमा आवद्ध युवा हुन् ।

तरुण दल बाँकेले आज एक विज्ञप्ती निकालेर घटनाको भत्सर्ना गरेको छ । अध्यक्ष विरेन्द्र बहादुर शाह र सचिव विनोद रिजालद्वारा हस्ताक्षरित विज्ञप्तीमा घटनामा संलग्न ब्यक्तिलाई कडा कारबाहीको माग गरिएको छ । अन्यथा आन्दोलनमा जान बाध्य हुने तरुण दलको चेतावनी छ ।

यसैबीच घटनामा संलग्नलाई कडा कारबाहीको माग गर्दै तरुण दल बाँकेले प्रदर्शन गरेको छ । कोहलपुरमा आज दिउँसो तरुण दलका कार्यकर्ताले एक घण्टा सडकमा प्रदर्शन गरेका हुन् ।