सशस्त्रद्वारा लुम्बिनीमा घटस्थापना यता ४८ लाख बढीको अवैध सामान बरामद

सुरक्षा-अपराध

गृहपृष्ठ
सुरक्षा-अपराध
सशस्त्रद्वारा लुम्बिनीमा घटस्थापना यता ४८ लाख बढीको अवैध सामान बरामद

सशस्त्रद्वारा लुम्बिनीमा घटस्थापना यता ४८ लाख बढीको अवैध सामान बरामद

बिहीबार, असोज २४, २०८१ बागेश्वरी पोस्ट

नेपालगन्ज । बडा दशैंको घटस्थापना सुरु भएयता लुम्बिनी प्रदेशस्थित सशस्त्र प्रहरी बलले ४८ लाख रुपैयाँ बढीको अवैध सामग्री बरामद गरेको छ ।

प्रदेशभरका विभिन्न जिल्लाबाट सशस्त्र प्रहरीले १ हप्ताको अवधिमा ४८ लाख ४६ हजार ४६४ रुपैयाँ बराबरका विभिन्न किसिमका अवैध सामग्री बरामद गर्दै सम्बन्धित भन्सार कार्यालयमा बुझाइएको सशस्त्र प्रहरी बल नं. ५ विन्ध्यावासिनी बाहिनी चन्द्रौटाका सूचना अधिकारी एसएसपी कमल तिउसिनाले जानकारी दिए ।

त्यस्तै मंगलबार साँझ पनि पाल्पास्थित सशस्त्र प्रहरी बल नं. ३५ गुल्मले बुटवलबाट स्याङ्जा जाँदै गरेको १ सय बोरा अवैध चिनी बोकेको लु १ ख ७०५६ नम्बरको ट्रकसहित चाललाई पाल्पाको तानसेन नगरपालिका-१ ध्रुवघाटबाट नियन्त्रणमा लिएर आबश्यक कारबाहीका लागि राजश्व अनुसन्धान कार्यालय बुटवल पठाइएको उनले बताए ।

यसैगरी सशस्त्र प्रहरीले प्रदेशभरका सीमाका दशगजा क्षेत्रमा २१ पटक भारतीय सीमा सुरक्षा बल (एसएसपी) सँग संयुक्त गस्ती गर्दा यस अवधिमा १ सय ४ पटक सशस्त्र प्रहरीको टोलीले मात्रै सीमा स्तम्भहरुको अवलोकन गरेको सशस्त्र प्रहरीले जनाएको छ ।

सशस्त्र प्रहरीले प्रदेशभरका ४२ स्थानका मन्दिर, बाटो, दशगजा र सार्वजनिक स्थलहरुको सरसफाई गरेको छ भने विभिन्न स्थानमा चाडपर्वलाई लक्षित गर्दै मनोरञ्जनका लागि १५ स्थानमा पिङ निर्माण गरेको एसएसपी तिउसिनाले बताए ।

विशेष गरेर सीमा नाकासँग जोडिएका १५ स्थानहरुमा सशस्त्र प्रहरीले लागूऔषधविरुद्ध, विपद, सीमा अपराध, दुर्घटना लगायतका विषयमा जनचेतनामूलक कार्यक्रम गरिसकेको जनाएको छ ।

एसएसपी तिउसिनाका अनुसार प्रदेशभरका १२ जिल्लामै सशस्त्र प्रहरीले चाडपर्व लक्षित सुरक्षा योजना तयार गर्दै आमनागरिकको शान्तिसुरक्षा र नेपाल भारतका सीमा नाकाबाट हुने अवैध चोरी-निकासी र अपराधिक गतिविधिलाई नियन्त्रण गर्न विन्ध्यावासिनी बाहिनीले टोली परिचालन गरिसकेको छ ।

प्रकाशित मिति: बिहीबार, असोज २४, २०८१ ०४:४४