दरबार हत्याकाण्डको आज २४ वर्ष पूरा

समाचार

गृहपृष्ठ
समाचार
दरबार हत्याकाण्डको आज २४ वर्ष पूरा

दरबार हत्याकाण्डको आज २४ वर्ष पूरा

सोमबार, जेठ १९, २०८२ बागेश्वरी पोस्ट

काठमाडौँ । आज राजदरबार हत्याकाण्ड भएको २४ वर्ष पूरा भएको छ । तत्कालीन राजा वीरेन्द्र शाहसहित राजपरिवारका सदस्यहरूको नारायणहिटी राजदरबारमा हत्या भएको आज २४औँ वर्ष पूरा भएको छ ।

वि.सं. २०५८ जेठ १९ गते शुक्रबार नारायणहिटी राजदरबारमा भएको एक पारिवारिक भोजका क्रममा यो हृदयविदारक घटना भएको थियो । उक्त घटनामा तत्कालीन राजा वीरेन्द्र, रानी ऐश्वर्य, अधिराजकुमार निराजन, अधिराजकुमारी श्रुति, वीरेन्द्रका कान्छा भाई धीरेन्द्र तथा राजपरिवारका अन्य सदस्यहरू शान्ति, श्रद्धा, जयन्ती र श्रद्धाका पति कुमार खड्ग विक्रम शाहको निधन भएको थियो ।

घटनापछि अर्धचेत अवस्थामा रहेका तत्कालीन युवराज दीपेन्द्रलाई जेठ २० गते राजा घोषणा गरिए पनि उनको पनि २०५८ जेठ २२ गते निधन भएको थियो । दीपेन्द्र उपचाररत रहेका बेला तत्कालीन अधिराजकुमार ज्ञानेन्द्र शाहलाई नायबी घोषणा गरिएको थियो, र दीपेन्द्रको निधनपछि ज्ञानेन्द्रलाई नै राजा घोषणा गरिएको थियो।

घटनाको छानबिनका लागि तत्कालीन प्रधानन्यायाधीश केशवप्रसाद उपाध्याय र सभामुख तारानाथ रानाभाट रहेको दुई सदस्यीय समिति गठन गरिएको थियो । उक्त समितिले दीपेन्द्रले सबैको हत्या गरी आत्महत्या गरेको प्रतिवेदन दिए पनि आम नेपाली जनताले उक्त प्रतिवेदनलाई पूर्णरूपमा स्वीकार गरेका छैनन् ।

प्रकाशित मिति: सोमबार, जेठ १९, २०८२ ०८:४५