धार्मिक पर्यटन प्रबद्र्धनार्थ नेपालगञ्जमा बन्दैछ १०८ फिट अग्लो हनुमान मूर्ति

स्थानीय

गृहपृष्ठ
स्थानीय
धार्मिक पर्यटन प्रबद्र्धनार्थ नेपालगञ्जमा बन्दैछ १०८ फिट अग्लो हनुमान मूर्ति

धार्मिक पर्यटन प्रबद्र्धनार्थ नेपालगञ्जमा बन्दैछ १०८ फिट अग्लो हनुमान मूर्ति

सोमबार, वैशाख ७, २०८३ बागेश्वरी पोस्ट

नेपालगञ्ज । नेपालगञ्जमा धार्मिक पर्यटनलाई प्रवद्र्धन गर्न नयाँ अध्याय सुरु भएको छ । देशकै पहिलो १०८ फिट अग्लो हनुमानको मूर्ति निर्माण कार्य अन्तिम चरणमा पुगेको छ, जसले नगरको धार्मिक र सांस्कृतिक महत्वलाई थप बलियो बनाउने अपेक्षा गरिएको छ । नेपालगञ्ज उपमहानगरपालिकाले १०८ फिट अग्लो हनुमानको मूर्ति बनाइरहेको छ । फाउन्डेसन र प्लेटफर्मको काम सकिएपछि अहिले धमाधम मूर्ति निर्माणको काम भइरहेको छ ।

नेपालगञ्ज उपमहानगरपालिका वडा नम्बर २ हनुमानगढीमा मूर्ति निर्माण भइरहेको छ । सिभिल इन्जिनियर सुरज शर्माले मूर्ति निर्माणका लागि पहिलोपटक २०७९ चैत ३ गते जम्बुदीप कन्स्ट्रक्सनसंग सम्झौता भएको बताए । सुरुवातको अवधि २०८१ चैत २ गतेसम्म रहेकोमा अहिले समयावधि थपेर २०८३ असोज ३० गतेसम्म लम्ब्याइएको छ । इन्जिनियर शर्माले १४ करोड ४ लाख ६३ हजार रुपैयाँमा सम्झौता भएको छ ।

नेपालगञ्जको पहिचान प्रसिद्ध शक्तिपीठ बागेश्वरीसंग जोडिएकोमा अब यसमा नयाँ आयाम थपिँदैछ । धार्मिक पर्यटन प्रवद्र्धनका लागि यहाँ हनुमानको मूर्ति बनाउन थालिएको हो । मूर्ति निर्माणमा लागिपर्नुभएका कालिगढ दिलबिर सुनार सेन्चुरीले ९० प्रतिशत काम सम्पन्न भइसकेको बताए । अबको डेढ महिनामा मूर्ति हस्तान्तरण गर्ने सेन्चुरीको भनाई छ । भारतको अयोध्यामा अत्याधुनिक राम मन्दिर बनेपछि राम र हनुमानको सम्बन्धलाई एकाकार गर्दै अयोध्यासंग नेपालगन्जलाई ‘टाइअप’ गर्ने उद्देश्यका साथ हनुमानको मूर्ति निर्माण भइरहेको नगर प्रमुख प्रशान्त विष्टले बताए । यसले नेपालगञ्जको धार्मिक पर्यटन प्रवद्र्धनमा टेवा पुग्ने नगर प्रमुख विष्टको विश्वास छ । उनले अयोध्यासंगको आध्यात्मिक कनेक्सन’ मा यो मूर्ति कोशेढुंगा सावित हुने विश्वास ब्यक्त गरे ।

स्थानीय ललित रौनियार र प्रदिप सापकोटालाई पनि १०८ फिट अग्लो हनुमान मूर्तिले नेपालगञ्जको धार्मिक पर्यटन प्रबद्र्धनमा सघाउ पुग्ने विश्वास छ ।

प्रकाशित मिति: सोमबार, वैशाख ७, २०८३ १९:२६

प्रतिक्रिया दिनुहोस्