डुडुवामा सामी चौथो चरण कार्यान्वयन मोडालिटी सम्वन्धमा अभिमुखीकरण

स्थानीय

गृहपृष्ठ
स्थानीय
डुडुवामा सामी चौथो चरण कार्यान्वयन मोडालिटी सम्वन्धमा अभिमुखीकरण

डुडुवामा सामी चौथो चरण कार्यान्वयन मोडालिटी सम्वन्धमा अभिमुखीकरण

सोमबार, वैशाख १४, २०८३ बागेश्वरी पोस्ट

डुडुवा (बाँके) । सामी चौथो चरण कार्यान्वयन मोडालिटी सम्वन्धमा अभिमुखीकरण कार्यक्रम गरिएको छ । डुडुवा गाउँपालिका रोजगार शाखाले सोमबार आयोजना गरेको कार्यक्रममा जिल्ला समन्वय समितिका प्रमुख ज्ञानेन्द्र कुमार चौधरीले बैदेशिक रोजगारीमा जानेहरु दलालबाट ठगिने हुँदा सचेत हुनुपर्नेमा जोड दिँदै रोजगारीमा जानेहरुका लागि सरकारले सहज प्रक्रियाको व्यवस्थापन गरेको बताए । सामी कार्यक्रम लुम्विनी प्रदेशका भागीराम थारुले बैदेशिक रोजगारीमा जानेहरुका लागि आवश्यक प्रक्रिया, भिसा लगायतका बारेमा जानकारी गराएका थिए ।

सामी कार्यक्रम अन्तर्गत सुरक्षित आप्रवासन सम्बन्धि सचेतना, सीप विकास तथा रोजगार प्रवद्र्धन, फिर्ता आएका आप्रवासीहरूको पुनःएकीकरण, मनोसामाजिक परामर्श तथा सहायता सेवा, अनुगमन तथा मूल्याङ्कन लगायतको सेवा प्रदान गर्ने गरिएको अभिमुखीकरणमा सहजीकरण गरेका सामी कार्यक्रमका जिल्ला संयोजक कमल सिंह नेपालीले बताए । चौथो चरणका लक्ष्य, रणनीति र प्राथमिकता, कार्यान्वयन मोडालिटी, स्थानीय तह र साझेदारहरूको भूमिका तथा जिम्मेवारी, सुरक्षित वैदेशिक रोजगार, आप्रवासन व्यवस्थापन र पुनःएकीकरण सम्बन्धि गतिविधि प्रभावकारी बनाउने उद्देश्यले कार्यक्रम गरिएको पालिकाका रोजगार शाखा प्रमुख अल्का मिश्रले जानकारी दिइन् । उनका अनुसार पालिकामा विदेश जाने तथा विदेशबाट फर्किएकाहरुलाई आवश्यक सेवा तथा परामर्श उपलब्ध गराउँदै आएको छ ।

कार्यक्रममा सामी कार्यक्रमको परिचय, पृष्ठभूमि, उपलब्धि (अघिल्ला चरणहरू), चौथो चरणका नयाँ फोकस क्षेत्रहरू, कार्यान्वयन मोडालिटी, संघ, प्रदेश र स्थानीय तहबीचको समन्वय संरचना, कार्यक्रम सञ्चालन प्रक्रिया, साझेदार संस्था र तिनको भूमिकाका बारेमा जानकारी गराइएको थियो । सामी चौथो चरण कार्यान्वयन मोडालिटी सम्बन्धमा सामान्यतया स्थानीय तह, सरोकारवाला निकाय र कार्यान्वयन साझेदारहरूलाई कार्यक्रम कसरी सञ्चालन गर्ने बारे जानकारी दिन अभिमुखीकरण गरिएको हो । पालिका उपाध्यक्ष शाहिदा बानोको अध्यक्षतामा सम्पन्न अभिमुखीकरणमा पालिकाका जनप्रतिनिधि, कार्यपालिका सदस्य, विषयगत शाखा प्रमुख तथा अन्य सरोकारवालाहरुको सहभागिता रहेको थियो ।