नेपालगञ्जको सडकबाट शुक्रबार पनि २४ छाडा पशु कान्जी हाउस लगियो

स्थानीय

गृहपृष्ठ
स्थानीय
नेपालगञ्जको सडकबाट शुक्रबार पनि २४ छाडा पशु कान्जी हाउस लगियो

नेपालगञ्जको सडकबाट शुक्रबार पनि २४ छाडा पशु कान्जी हाउस लगियो

शुक्रबार, वैशाख १८, २०८३ बागेश्वरी पोस्ट

नेपालगञ्ज । नेपालगञ्ज उपमहानगरपालिकाले नगर क्षेत्रभित्र बढ्दो छाडा पशुचौपायाको समस्या नियन्त्रण गर्न अभियानलाई थप तीव्र बनाएको छ । शुक्रबार बिहान ५ बजेदेखि सञ्चालन गरिएको अभियान अन्तर्गत विभिन्न स्थानबाट छाडा पशु संकलन गरी वडा नं. २१ स्थित कान्जी हाउसमा व्यवस्थापन गरिएको हो ।

उपमहानगरपालिकाका नगर प्रहरी निरीक्षक सूर्य बहादुर बोगटीका अनुसार संकलित पशुहरूमा २० वटा गाई तथा बाच्छाबाच्छी र ४ वटा साँढे रहेका छन् । यससँगै शुक्रबार एकै दिनमा कुल २४ वटा छाडा पशु सुरक्षित रूपमा व्यवस्थापन गरिएको जनाइएको छ । गत शनिबारदेखि दैनिक यो अभियान चलिरहेको छ । कान्जी हाउसमा राखिएका पशुलाई केही दिन अघि ट्रकमा राखी राप्तीसोनारी गाँउपालिका वडा नम्बर २ सम्शेरगञ्जस्थित १८५ हेक्टरमा फैलिएको मंगल राधिका सदानन्द गौ सेवाधाममा ब्यवस्थापन गरिएको छ ।

सडकमा छाडा पशुका कारण बढ्दै गएको दुर्घटनाको जोखिम न्यूनीकरण तथा नगरको सुन्दरता कायम राख्ने उद्देश्यले अभियान सञ्चालन गरिएको नगर प्रमुख प्रशान्त विष्टले बताए । यसअघि पनि नियमित रूपमा यस्ता अभियान सञ्चालन हुँदै आएको र आगामी दिनमा अझ प्रभावकारी रूपमा निरन्तरता दिइने बताइएको छ ।

प्रकाशित मिति: शुक्रबार, वैशाख १८, २०८३ ११:४३

प्रतिक्रिया दिनुहोस्