निजी सम्पत्तिमा जबर्जस्ती डोजर चलाइएको जयबागेश्वरी स्कुलको आरोप

स्थानीय

गृहपृष्ठ
स्थानीय
निजी सम्पत्तिमा जबर्जस्ती डोजर चलाइएको जयबागेश्वरी स्कुलको आरोप

निजी सम्पत्तिमा जबर्जस्ती डोजर चलाइएको जयबागेश्वरी स्कुलको आरोप

बिहीबार, वैशाख २४, २०८३ बागेश्वरी पोस्ट

नेपालगञ्ज । जय बागेश्वरी आवासीय माविले नेपालगञ्ज उपमहानगरपालिकाले निजी सम्पत्तिमा जबर्जस्ती डोजर चलाएर भौतिक संरचना क्षति पुर्‍याएको आरोप लगाएको छ ।

विद्यालयले आज पत्रकार सम्मेलन गर्दै मेयर प्रशान्त विष्टको नेतृत्वमा आएको उपमहानगरपालिकाको टोलीले कम्पाउण्डभित्र प्रवेश गरी डोजर चलाएर करीब एक करोड रुपैयाँ बराबरको क्षति पुर्‍याएको दाबी गरेको छ । विद्यालयका अनुसार कम्पाउण्डको पर्खाल भत्काउनुका साथै गाडी सेड, क्रिकेट ग्राउण्ड र नेट पोल समेत डोजर लगाएर नष्ट गरिएको छ । डोजर चलेको करीब एक घण्टापछि विद्यालय परिवार आक्रोशित बनेपछि भने डोजर फिर्ता भएको विद्यालयको भनाई छ ।

विद्यालय प्रशासनले उक्त जग्गा २०५२ सालमा खरिद गरिएको दाबी गर्दै नापी तथा अदालतका विभिन्न कागजातले पनि आफ्नो पक्षलाई पुष्टि गर्ने जनाएको छ । विद्यालयले नालीसम्बन्धि विवाद अदालतमा विचाराधीन रहेको अवस्थामा उपमहानगरपालिकाले बल प्रयोग गरेर डोजर चलाउनु कानुन विपरीत भएको आरोप लगाएको छ ।

पत्रकार सम्मेलनमा विद्यालयका सञ्चालक विद्यामान राजभण्डारीले अदालतमा निषेधाज्ञासम्बन्धि मुद्दा चलिरहेकै अवस्थामा नगरपालिकाले कुनै पूर्व सूचना वा सहमति बिना निजी सम्पत्तिमा प्रवेश गरेको दाबी गर्नुभएको छ । क्षतिपूर्तिको मागसहित कानुनी उपचार खोज्ने चेतावनी पनि विद्यालयले दिएको छ । "हामीले विधिको शासन महसुस गर्न पाएनौं," राजभण्डारीले भने- "मेयर हामीप्रति बायस हुनुभयो, नालीले नै मेरो जमिन खाएको छ अनि मलाई नै डिमोरलाइज गरिँदैछ ।" पत्रकार सम्मेलनमा उनी सुरुदेखिका कागजातसहित प्रस्तुत भएका थिए ।

May be an image of ticket stub and text