वैदेशिक रोजगारबाट फर्किएकाको सीपलाई स्थानीय विकाससँग जोड्दै कोहलपुर

स्थानीय

गृहपृष्ठ
स्थानीय
वैदेशिक रोजगारबाट फर्किएकाको सीपलाई स्थानीय विकाससँग जोड्दै कोहलपुर

वैदेशिक रोजगारबाट फर्किएकाको सीपलाई स्थानीय विकाससँग जोड्दै कोहलपुर

मंगलबार, जेठ ५, २०८३ बागेश्वरी पोस्ट

नेपालगञ्ज । कोहलपुरमा वैदेशिक रोजगारबाट फर्किएका नागरिकहरूको अनुभव, सीप, पुँजी र प्रविधिलाई स्थानीय उत्पादन तथा उद्यमसँग जोड्ने उद्देश्यले पुनः एकीकरण कार्यक्रम गरिएको छ । आप्रवासी श्रमिक संरक्षण सञ्जालको संयोजन तथा कोहलपुर नगरपालिका नगर कार्यपालिका कार्यालय रोजगार सेवा केन्द्रको आयोजनामा कार्यक्रम गरिएको हो ।

कार्यक्रमको उद्घाटन गर्दै नगर प्रमुख पूर्ण प्रसाद आचार्यले वैदेशिक रोजगारबाट फर्किएका व्यक्तिहरूको सीप र अनुभवलाई स्थानीय विकासमा उपयोग गर्न स्थानीय सरकार प्रतिबद्ध रहेको बताए । उनले वैदेशिक रोजगारमा जान चाहनेदेखि विदेशबाट फर्किएकासम्मलाई लक्षित गर्दै नगरपालिकाले छुट्टै शाखा स्थापना गरी सीपमूलक तथा पुनः स्थापना कार्यक्रम सञ्चालन गरिरहेको जानकारी दिए । नगर प्रमुख आचार्यले वैदेशिक रोजगारीमा रहेका व्यक्तिका परिवारलाई वित्तीय साक्षरता, मनोसामाजिक परामर्श तथा सामाजिक सुरक्षासम्बन्धि सेवा समेत प्रदान गर्दै आएको उल्लेख गरे । “पछिल्लो समय प्रविधिको तीव्र विकाससँगै श्रम संकुचन हुँदै जानु चुनौतीपूर्ण बनेको छ,” उनले भने, “अब सीपयुक्त जनशक्तिलाई स्वदेशमै अवसर सिर्जना गर्न आवश्यक छ ।”

उपप्रमुख संगिता सुवेदीले वैदेशिक रोजगारबाट फर्किएका युवाको सीप र अनुभव नै स्थानीय सरकारको महत्वपूर्ण पुँजी भएको बताइन् । उनले विदेशमा सिकेको ज्ञान र प्रविधिलाई स्थानीय उत्पादन, उद्यमशीलता र रोजगारीसँग जोड्नुपर्नेमा जोड दिइन् । आप्रवासी श्रमिक संरक्षण सञ्जालका अध्यक्ष खड्क चन्दको अध्यक्षतामा सम्पन्न कार्यक्रममा स्वागत मन्तव्य तथा कार्यक्रमको उद्देश्यबारे रोजगार सेवा केन्द्रका संयोजक आशिष वर्माले प्रकाश पारेका थिए । कार्यक्रममा सामाजिक विकास समिति संयोजक इश्वरी प्रसाद विकसहित जनप्रतिनिधि, पत्रकार तथा सरोकारवालाहरूको सहभागिता रहेको थियो । सहभागीहरूलाई लोकराज सञ्जाल र दिपेन्द्र जोशी लगायतले सहजीकरण गर्नुभएको थियो ।

वैदेशिक रोजगारबाट फर्किएका नागरिकलाई पुनःस्थापनासँगै उनीहरूको सीप र अनुभवलाई स्थानीय अर्थतन्त्रसँग जोड्दै आत्मनिर्भर समाज निर्माणमा टेवा पुर्याउन कार्यक्रम गरिएको रोजगार सेवा केन्द्रका संयोजक वर्माले बताए । त्यसक्रममा सहभागीहरुले आफ्नो अनुभव तथा स्थानीय सरकारसँगको अपेक्षाहरु खुलेर राखेका थिए ।

प्रकाशित मिति: मंगलबार, जेठ ५, २०८३ १७:४६

प्रतिक्रिया दिनुहोस्